BOEREKOS – TROOSKOS!

As jy jou huismense nou behoorlik wil bederf, kan jy die heerlikste disse op ShowMax te sien kry. Danksy ‘n wye verskeidenheid kosprogramme kan jy kook soos die kosghoeroes! Jy kan Nataniël en Marita van der Vyver volg waar hulle jou stap vir stap wys hoe om liplekkergeregte te maak.

Na ‘n besonderse koue, nat winter is dit byna onwerklik om te dink dat bosbrande ‘n gevaar kan inhou, maar dis miskien juis die oordadige plantegroei ná die goeie reën wat ‘n brandgevaar kan laat toeneem. As die nuwe fynbos en jong lote eers deur die Australiese son verdor word, sal dit nie veel neem om ‘n wegholbrand te veroorsaak nie. Neem gerus kennis van ‘n paar wenke wat jy kan onthou en toepas om vir so ‘n gebeurlikheid voor te berei.

Merise kuier met ‘n jong Afrikaanse kunstenaar wat groot opslae in Australië maak – al is hy skaars droog agter die ore. Ontmoet Du Toit Bredenkamp op bladsy 8 en lees hoe hierdie talentvolle jongman as een van die top ses jong kunstenaars in die land aangewys is.
Onthou jy nog vir Koos Kombuis? Sit agteroor en geniet die lekkerleesartikel oor ‘n rooi posbus uit Koos se pen. Moenie dit misloop nie!

Tot volgende keer,
Suzette

DIE KEUSE IS JOUNE . . .

Soms gebeur daar dinge waaroor jy geen beheer het nie, maar jy kan nog altyd kies hoe jy daarop reageer. As ‘n botteltjie konfyt sou uitval wanneer jy die yskasdeur oopmaak en dit in skerwe op die kombuisvloer  breek, met glas en konfyt wat in alle rigtings gespat het, is daar ‘n breukdeel van ‘n sekonde wanneer jy kan besluit hoe om te reageer. As jy besef dis maar net gravitasie wat te sterk was, sal dit waarskynlik vyf minute neem om die gemors skoon te maak. As jy woedend en luidkeels jou huismense en sommer die wêreld blameer, begin jou dag op die verkeerde voet en sal dit heel moontlik die res van jou dag omkrap.

Emigrasie is nie maklik nie, maar dit is jou keuse hoe om dit te verwerk. In hierdie uitgawe gesels ons met inspirerende vroue wat die trauma van emigrasie oorkom het en nou ‘n positiewe bydrae tot hul gemeenskap lewer. Sukses het nie oornag gebeur nie, maar hul volgehoue deursettingsvermoë is uiteindelik beloon.

Kinders word op verskillende vlakke deur migrasie beïnvloed. UNICEF het ‘n studie gemaak van migrantefamilies in welvarende lande (waarvan Australië een was) en gevind dat ‘n derde van die Australiese kinderbevolking uit migrantekinders bestaan. Hierdie kinders woon gewoonlik saam met ouers wat universiteitsgrade verwerf het en meer as die helfte van hierdie kinders se ma’s werk in die arbeidsmark. Merise berig oor verskillende wyses hoe jy jou kind kan help om by sy nuwe lewe aan te pas.

Suksesvolle migrasie word uiteindelik gemeet aan die mate waarin jy in jou nuwe gemeenskap integreer. Wat sal jy doen as jou volwasse kind swig voor Australiese sjarme en sommer die knoop wil deurhaak? ‘n Leser vertel haar storie. 

Hierdie uitgawe van Merise is met liefde deur die Merise-span geskep en ontwerp. Ons hoop dat jy elke artikel sal geniet en dat vandag en elke dag mooier sal wees met ‘n vriendin soos Merise. 

Baie dankie dat ons by jou kon inloer.
Groete,
Suzette

Liewe Leser,
Voorspoedige 2018! Ons hoop dat hierdie jaar net die mooiste vir jou en jou mense inhou.

‘n Nuwe jaar bring dikwels nuwe uitdagings, en as jy moontlik op soek is na ‘n nuwe werk kan jy gerus kyk na die uitstekende wenke wat Pathway Lawyers & Migration Agents saamgestel het. Die artikel is op Merise se webblad by www.merise-tydskrif.com.

‘n Paar jaar gelede het Jaap Pienaar met Merise-lesers gesels oor tuinmaak in Perth se sanderige woestyngrond. Volgens hom is jy óf ‘n tuinier, óf jy het ‘n tuin. Die meeste van ons hou van ‘n mooi tuin, maar word ontmoedig deur die tyd en moeite wat daarmee gepaardgaan. In hierdie uitgawe kyk ons na plante wat met ‘n klein bietjie moeite baie vreugde bring.

Is kinders se speelgoed skadelik vir hul siening van die wêreld en van hulself? Weet jy watter vervaardigers voeg skadelike chemikalieë by hul sonskermprodukte? Is daar ‘n gesonde wyse om suiwel by jou dieet te voeg, selfs al ly jy aan diabetes? Is daar hoop vir die arme Naomi van Binnelanders?

Soos jy kan sien, is hierdie uitgawe sommer propvol interessante leesstof vir elkeen.
Dankie dat ons by jou kon inloer.
Lekker lees tot volgende keer!
Suzette


SOMER, SON EN VAKANSIE . . .
Ons ken almal die ware betekenis van Kersfees en hoekom ons dit vier, maar die gesig van ‘n vriendelike, bebaarde ou man in ‘n rooi pak het ook al sinoniem geword met Kersfees, al weet ons al te goed dat die idee van Kersvader, en veral die koop van geskenke, aangeblaas word deur ywerige kleinhandelaars. Daar is groot pret wanneer dié wat weet entoesiasties saamsweer teen dié wat nog moet uitvind of Kersvader werklik bestaan of nie. In sommige huise word baie moeite gedoen om die egtheid van Kersvader te bewys. Maar wat is die storie agter die storie?
Vir ons in die Suidelike Halfrond is die Kersseisoen sinoniem met somer, son en vakansietyd. Vergete is die stryd teen die weegskaal en ekstra sentimeters om die middellyf. Volgende jaar sal ons weer verlede jaar se nuwejaarsvoornemens herhaal en opnuut die stryd aansê, maar vir nou is dit pavlova-tyd!
Die Merise-span wens graag vir jou en jou geliefdes ‘n geseënde en vreugdevolle Kerstyd toe. Mag die herdenking van die geboortedag van ‘n spesiale Babaseuntjie nuwe hoop en vertroosting bring.
Dankie dat ons by jou kon inloer.
Geseënde Kersfees!
Suzette

Oor Rissies en Reis . . .

As daar nou een iets is waarvoor Suid-Afrikaners toenemend lief geword het, is dit om te reis! Dit maak nie saak in watter land hulle nou woon nie, die tassies word maklik gepak en die wêreld word sonder skroom plat gerits. 

Dis asof die blootstelling aan ander kulture sommer ook die kreatiewe denke ‘n hupstoot gee. In hierdie uitgawe kyk ons na interessante idees om kleure, teksture en meubelstukke te kombineer om jou huis met ‘n unieke dekorstyl te versier.

Bak en brou is mos eie aan Suid-Afrikaners en Merise gee wenke vir smaaklike melkskommels en ons leer jou hoe om met rissies te kook.

Dan vertel ons jou ook van ‘n heerlike romkom . . . net reg vir die naweek se agteroorsit!

Baie dankie dat ons by jou kon inloer.
Lekker lees, tot volgende keer,

Carla Lewis se artikel is geskryf asof dit gestuur is. Dit mag wel heerlike lente wees, maar daar is beslis meer van my ná die afgelope winter. Kom ons blameer dit op die weer. As dit nie so koud en nat was nie, sou ek sekerlik meer gaan stap het en dan was ek nie nou in hierdie penarie nie. Maar Carla gee hoop. Met ekstra selfbeheer kan jy die ekstra vetjies afskud sonder om kamma te smul aan vreemde kossoorte met ‘n nog vreemder spelling en sonder dat jy jouself blootstel aan die marteling van erge hongerpyne.

As jy al ‘n rukkie Hier Onder woon, sal jy weet dat jou tuin een van die dae gaan swaarkry onder die fel strale van die ongenaakbare Australiese son. Gelukkig kan jy die mooiste vetplante insit om jou tuin te verfraai sonder om die “waterpolisie” te ontstel as jy meer as jou waterkwota gebruik.

Het jy al ooit met bier gekook? In hierdie uitgawe wys Merise hoe jy in ‘n japtrap die allerlekkerste bredie en gevlegte brood kan maak . . . net reg vir die naweekkuier!

Jy kan natuurlik ook terugsit en jouself met heerlike vermaak op ShowMax bederf. Merise vertel van die reeks, Brood en botter, wat oor kos-entrepreneurskap handel.

Geestesgesondheid en afbrekende verhoudings geniet baie aandag, veraI hierdie tyd van die jaar. World Mental Health Day sal vanjaar op Dinsdag 10 Oktober- so saam met Paul Kruger se verjaardag -en op 25 November word 'n internasionale dag gehou, naamlik White Ribbon Day, om geweld teen vroue uit te wis. Vanjaar se veldtog sluit "#AManslssueToo" in, want mans is ook dikwels slag offers in afbrekende verhoudings.

Merise probeer'n bydrae lewer deur jou meer hiervan te vertel. Kennis is mag. Statisties word miljoene mense jaarliks hierdeur geraak en baie hartseer sou gespaar kon wees as slag offers vroeer die tekens kon raaksien en dienooreenkomstig opgetree het.

Baie dankie vir die wonderlike leserbydraes wat ons ontvang het! In hierdie uitgawe kan jy lekker lees oor pragtige plekke in Australie en daar is allerlei foto's, interessante artikels, smullekkerresepte en ons dierbare Ouma uit die Hartland deel weer'n brief aan haar kleinkinders.

Ons hoop dat jy jou eie Afrikaanse glanstydskrif hier in die vreemde sommer baie sal geniet en dat jy wyd en syd gaan verkondig dat Merise elke sent werd is!

Voorlopig gaan ons net twee uitgawes per jaar druk. Jou volgende uitgawe behoort dus in die eerste kwartaal van die nuwe jaar te verskyn. Onthou asseblief om ons telaat weet as jou ad res of e-posadres verander sodat ons jou op die hoogte kan hou van wat in Merise se wereld gebeur.

Dankie dat ons by jou kon inloer.
Vriendelike groete,
Suzette

DINGE IS AAN DIE GEBEUR!

Groot opwinding heers in Merise se midde want, soos jy moontlik al gehoor het, word daar kliphard gewerk om uiteindelik weer ‘n volgrootte tydskrif te publiseer! Dit beloof om interessante en lekkerleesartikels te wees en die een bladontwerp wil mooier as die volgende wees. Ons sien daarna uit om hierdie uitgawe, spesiaal in Afrikaans geskryf, met jou te deel. As jy nog nie jou uitgawe bestel het nie, kan jy dit doen by: www.merisemag.com/eng/subscribe-to-merise.

Intussen werk ons ook hard aan ‘n lekker kuiermiddag op 14 Oktober in Harrisdale, Perth. Azelene Williams gaan gesels oor hoe jy jou kind of iemand na aan jou teen ongesonde verhoudings kan beskerm en Sumi Botha gaan vir ons sing. Daar sal ook interessante stalletjies wees en natuurlik smullekker happies. Bespreek jou plek op Merise se webblad (www.merisemag/com). Ons kan nie wag om saam met jou te kuier nie!

In hierdie boekie kyk ons na ‘n resep om geluk te vind en die vertroosting wat Facebook bied. Daar is ‘n heerlike resep en Merise vertel van ‘n reeks op ShowMax wat jou nie onaangeraak sal laat nie.

Baie dankie dat ons by jou kon inloer.

Lekker lees, tot volgende keer,
Suzette

Vreemde dinge . . .

Die eienaardigste ding het nou die dag met my gebeur. Ek was by ‘n plaaslike netwerkfunksie toe ek skielik ontsettend siek begin voel het. Ek was naar met ‘n allemintige skeelhoofpyn daarby wat soos ‘n seekatarm van my agterkop tot oor my regteroog beweeg het. Daar was net een uitweg . . . buitentoe! Die oomblik toe ek die gebou verlaat het, het ek beter begin voel en sowat ‘n halfuur later was ek weer reg.

Boeglam geskrik, het ek my na die “universiteit” van Google gewend. ‘n Soektog na soortgelyke simptome het “sick building syndrome” opgelewer, waar inwoners van ou geboue so kan voel wanneer daar nie voldoende vars lug ingelaat word nie. Nadat ek nog verder in die nimmereindigende web van Google gedelf het, het ek afgekom op die gebruik van potplante wat lug suiwer van gifgasse om meer suurstofryke lug te verseker – en dis juis waarom ons in hierdie uitgawe meer daarvan vertel. Na al die navorsing wat ek gedoen het, het ek sommer dadelik potplante vir die huis en kantoor aangeskaf. Ons kon onmiddellik die verskil voel en ruik! 

Blaai na bladsy xxx om vir jou gesin die allerlekkerste pampoenkoekies te maak. Lees meer oor Egiptiese speserye en iewers in hierdie boekie vertel ons jou ook van ‘n vreemde uitvindsel . . .

Baie dankie dat ons by jou kon inloer.

Lekker lees, tot volgende keer,
Suzette


‘n Ewige stryd

Dit gaan om oorlewing – ‘n stryd ouer as die berge! Van meet af aan moes die oermens swoeg en sweet om genoeg kos bymekaar te maak sodat hy nie van honger omkom nie. Erge klimaatsverandering het ook die toekoms van die mens bedreig en dit was so hittete of die mensdom soos ons dit ken, was ‘n paar duisend jaar gelede uitgewis. Gelukkig het dinge anders uitgewerk en kon ons voorsate die basis lê vir die moderne mens . . . maar moeder natuur betaal ‘n prys vir ons ontwikkeling. Lees meer hieroor op bladsy 2.
Wintertyd is sinoniem met verkouetyd en soos elke ander jaar gaan allerlei kieme en virusse hul onwelkome opwagting maak. Behoort jy jouself te laat inent teen verkoue en griep? Twee Australiese kenners verduidelik.

Het jy geweet dat quinoa die vrug is van ‘n proteïenryke kruieplant wat in die antieke tye as die “moedergraan” beskou was? Maak ons heerlike, gesonde groentesop hierdie winter. Jy kan ook ‘n gesonde smelt-in-die-mond-happie aanlyn bestel. Dis uniek!
Ons kuier op 30 Junie 2017 by Kalahari in Clarkson van 9.30 vm tot 11.30 vm en dit sal so lekker wees om jou ook daar te sien. Bespreek jou kaartjie so gou moontlik by www.merisemag.com.

Baie dankie dat ons by jou kon inloer.
Lekker lees, tot volgende keer,
Suzette

Suid-Afrikaners oor die hele wêreld heen, het onlangs gewys dat Afrika altyd ’n plekkie in ons harte sal hê toe daar oral spontaan gebedsgroepe gestig is om saam met die evangelis, Angus Buchan, vir dié land te bid. Op 4 Junie hou SAMVOA ‘n kranslegging by die South African War Memorial in Perth vir Suid-Afrikaanse soldate wat gesneuwel het. In September word Afrikaans behoorlik gevier met die Afrikaans is Lekker-konserte. Wat ‘n voorreg om ons herkoms só aan die groot klok te kan hang!

As jy nog nie jou volgende vakansie beplan het nie, is nou die tyd om dit te doen. Daar is ‘n pragtige plekkie wat jy gerus kan gaan besoek. 

Die sleutel tot ‘n gesonde liggaamsmassa is nie so eenvoudig nie. ‘n Kundige vertel meer.

Bederf jou huisgesin met eg Franse kookkuns! Merise wys jou hoe.

Is daar ‘n vertrek of hoekie in jou huis wat ‘n bietjie aandag moet kry? Kry nuttige wenke daaroor op ShowMax. 

Baie dankie dat ons by jou kon inloer!
Mooi bly tot volgende keer,
Suzette

Dis vroegherfs en ek begin al die kniekombersie afstof. Nie dat dit koud is nie – dis immers nog lekker warm buite – maar die dae word ooglopend korter en ek wil voorbereid wees as dit koud word. Een van die dae is die amptelike “somertyd” verby en dan skuif die Australiese ooskus met ‘n uur nader aan die weskus.

Soos vantevore gebeur seisoenskommeling nie sonder ‘n teatrale vertoning van die weerman nie. Woeste winde ruk die Kaapstad-fietstoer in die Moederstad tot stilstand en superstorms in Queensland en NSW rig groot skade aan. Nieu-Seeland word deur ‘n “waterbom” getref en sneeu word in die middel van die somer neergegooi op die Alpine-ski-oorde. Groot verandering is ooglopend op pad. Ek trek die kniekombersie sommer nog nader!

Maar jy hoef nie te bekommer nie. Merise het spesiaal vir jou ‘n lekkerleesboekie saamgestel met ‘n ietsie vir elkeen: Lekker resepte, goeie vermaak, interessante inligting oor jou brein en raad vir die ywerige tuinier. 

Dankie dat ons by jou kon inloer!

Groete, tot volgende keer.
Suzette


Totsiens, Joost!

Australië se migrasiebeleid raak die meeste van ons. Daarom het Merise in diepte gekyk na voorstelle wat onlangs deur die Productivity Commission aan die regering voorgelê is. Dit is nog nie wetgewing nie, maar dis altyd goed om op die hoogte te wees van hoe dié land se owerhede oor hierdie belangrike kwessie voel. 

Om van ‘n geliefde afskeid te neem, is hartverskeurend. Maar as jou oom Joost van der Westhuizen was, is jou hartseer aan die wêreld ontbloot. Merise-leser Sumari Botha wat in Perth woon, was gevra om haar liedjie “Mr. No. 9” tydens Joost se gedenkdiens te sing. “Mr. No. 9” het daarna groot opslae regoor die wêreld gemaak en meer as 300 000 mense het oor die internet daarna geluister. 
Tussen ShowMax en Netwerk24 hoef Suid-Afrikaners wat buite Suid-Afrika woon, op niks uit te mis nie. Jy kan ‘n horde films, reekse, aktualiteitsprogramme en vele meer op ShowMax geniet. Netwerk24 sorg weer dat jy met aktuele nuus en lekker leesstof ingelig bly. 
Met Paasfees om die draai, kan jy heerlike donkersjokoladeklapperstafies maak wat relatief gesond is of jy kan jou kinders help om ‘n pragtige feetjietuin te skep. Merise vertel ook meer oor die rolprentweergawe van die bekroonde Lien se lankstaanskoene, die debuutwerk van skrywer Derick van der Walt.

Tot volgende keer,
Suzette

DIE NUWE JAAR IS HIER!

En so het 2017 sy opwagting gemaak. Die geharwar van pendel tussen werk, skool, huis en winkels is in volle swang en die heerlike somervakansie is ‘n vae herinnering. As jy met jou hande in jou hare sit oor jou skoolkind se skielike vreemde gedrag, is dit dalk ‘n goeie idee om die artikel op bladsy 2 te lees.

Het jy al van die drywende woud in Sydney gehoor? Jani Rousseau skryf oor hierdie unieke verskynsel wat in die eertydse skrootwerf van Homebush Bay ontstaan het.

Vir ervare reisigers lê die waarde van reis in die belewenisse wat bybly lank nadat vergeelde foto’s van vreemde plekke en vreemde standbeelde stof begin vergaar het. Tinus van Staden gesels hieroor.
Papsak is in vervoering oor ‘n heerlike rooiwyn wat hy onlangs ontdek het. As jy eers meer oor hierdie smaaksensasie te wete kom, sal jy dit beslis ook wil uittoets.

Suid-Afrikaners en biltong is onafskeidbaar en stel dit graag met groot trots aan hulle nuwe landgenote bekend. Maak Mufasa se heerlike biltongslaairesep vir vriende en familie. Dit is ‘n treffer!

Lekker lees tot volgende keer,
Suzette

Het jy geweet dat daar ‘n unieke, prentjiemooi feëtjiehotel in Australië is? Dis ‘n plek waar jy op die hande gedra word terwyl jy jou telkens moet knyp om seker te maak dat jy nie dalk in droomland is nie. Dis nie goedkoop nie, maar ‘n heerlike bederf as jy dit kan doen.

Afrikaners se herkoms kan relatief maklik gevolg word omdat daar goed boekgehou was van nuwe aankomelinge en wat daarna van hulle geword het. Lees ‘n bietjie oor gene wat jy moontlik in jou saamdra of dalk gelukkig vrygespring het.
Ek het onlangs die reeks Donkerland op ShowMax ontdek. Ek moet bieg, die naam het my nie juis aangetrek nie want ek was bang vir ‘n ewige gewroeg, maar ek was aangenaam verras. Dis die storie oor die lewensloop van sewe geslagte uit dieselfde familie oor ‘n tydperk van 158 jaar, met die mooiste natuurskoon in die agtergrond.

Met Kersfees om die draai is dit tyd om die oondhandskoene uit te haal. Hoekom probeer jy nie die heerlike broskoekresep wat in hierdie uitgawe verskyn nie? As dit een van koningin Elizabeth se gunstelinge is, kan dit mos nie beter nie!
Merise wens graag vir jou en jou gesin ‘n geseënde Kerstyd toe. Mag julle ‘n besonderse tyd ervaar en die nuwe jaar net die mooiste bring vir jou en almal vir wie jy lief is.

Suzette

Die lente is hier – uiteindelik! Die eerste kleure begin geleidelik deurskemer in my tuin soos die blomme huiwerend oopvou . . . versigtig, asof hulle eers oortuig moet word dat die snerpende koue werklik verby is. Die son kuier ‘n bietjie langer voor hy lang skaduwees gooi en kaalvoetkinders baljaar buite op sagte groen tapyte. Die koms van die lente is voorwaar iets om te vier en in hierdie uitgawe kan jy die resepte vir ‘n maklike roomys en verfrissende Sangria gebruik om die kinders en ook grootmense mee te bederf.

Eersdaags gaan daar weer ‘n groot fees in Afrikaans plaasvind wat jy nie moet misloop nie! Dis voedsel vir die siel en ‘n kosbare geleentheid om weer tussen “jou” mense te kan wees – mense wat jou naam en van reg kan spel en uitspreek. Wat meer kan jy dan nou verlang? 

Dankie tog vir ShowMax! Hierdie nimmereindigende bron van vermaak bied vertroosting wanneer verlange aan die siel knaag. En die beste van alles . . . jy kan dit saam met jou Engelssprekende ander helfte, kinders en vriende geniet, want feitlik elke program het Engelse onderskrifte. 

Merise kyk in hierdie uitgawe na die kuns om ‘n goeie verhouding met jou lewensmaat te hê en gee ook meer inligting oor ‘n toer volgende jaar deur die Bybellande saam met Bobby van Jaarsveld.

Lekker lees!

Ek sal nooit vergeet nie hoe verlore ek was toe ek die eerste keer in Australië groente gekoop het. Vol vertroue het ek by Woolworths ingestap in die oortuiging dat Woolworths in Australië net ‘n replika van Woolworths in Suid-Afrika sou wees. Groot was my verbasing toe daar ‘n hele klomp vreemde groentes in die rakke voor my uitgestal was. Selfs die aartappels was vreemd! Jare lank het ek slegs die bekende wit aartappels gekoop, maar na ‘n ruk het ek ewe dapper die perses probeer. Ek het gereken dat die skilkleur sekerlik nie die smaak kan beïnvloed nie, maar hoe verkeerd was ek nie! Die pers aartappels met ‘n gelerige vleeskleur is veel lekkerder as die gewone wittes. En dit was die begin van my avontuur om vreemde groente en vrugte uit te toets. In hierdie uitgawe vertel Renier du Plessis meer oor die verskillende soorte aartappels wat beskikbaar is en hoe om daarmee te kook.

As jy in Perth woon, kan jy eenvoudig nie die Afrikaanse kerk se groot basaar met sy gesellige atmosfeer en tradisionele eetgoed misloop nie! En vir almal in Adelaide wag daar ‘n heerlike kuier om braaidag volgens eg-Suid-Afrikaanse tradisie te vier.

Maak nie saak waar in die wêreld jy jou bevind nie, ShowMax is ‘n absolute moet! Praat met enigeen wat al ingeteken het en hulle sal jou vertel watter kykgenot dit bied. Teken sommer nou in vir ure se kykfees– jy sal nie spyt wees nie!

Lekker lees tot volgende keer.

Ai, dis darem maar lekker om Afrikaans te kan geniet in Annerland! Merise skryf graag oor kuiers wat plaasvind en in hierdie uitgawe vertel ons van twee Afrikaanse gesellighede wat in die nabye toekoms gaan gebeur. Onthou om ons te laat weet (info@merisemedia.com.au) van sosiale gebeure of gesellighede in jou omgewing.

Rita Kritzinger was so gaaf om ‘n stukkie te skryf oor hul lewe in Bathurst en ons moes net eenvoudig meer te wete kom oor hierdie dorp (amptelik ‘n stad) in NSW, waar talle eks-Suid-Afrikaners woon. Ons supersjef, Renier du Plessis, woon ook daar en het Rita se arm gedraai om haar heerlike familieresep vir kammawildspastei met Merise te deel.

Stephanie van Tonder het tydens hul onlangse besoek aan Suid-Afrika ‘n stel met die metropolisie afgetrap omdat sy met ‘n Australiese bestuurslisensie bestuur het. Merise het gaan nalees oor wat die wet oor hierdie aspek sê.

ShowMax – meer as twaalfduisend programme! My naweke is nie meer dieselfde nie, maar ek kla nie. Wat ‘n plesier om so bederf te word met die keur van Afrikaanse TV-programme wat net ‘n klik ver is. Watter programme tel onder jou gunstelinge? Stuur gerus ‘n e-pos na info@merisemedia.com.au en vertel ons.

Lekker lees!


Groot nuus . . . Ek was genooi om namens Merise op die stel van die TV-treffersepie Binnelanders te gaan kuier en ‘n paar van die geliefde akteurs te ontmoet. Ernst Swart, publisiteitsbestuurder van Binnelanders, het my deur die ateljee geneem en gewys waar die verskillende tonele geskiet word, hoe groot die garderobe is en my selfs aan die grimeerkunstenaars voorgestel. Ek is nou sommer vuur en vlam om die hele reeks van die begin af op ShowMax te kyk. Lees meer hieroor op bladsy 4.

Dit bly darem ‘n heerlikheid om ‘n nuwe land bietjie-bietjie te verken. En dis nog lekkerder wanneer Merise-lesers hul ondervindings met ons deel. Baie dankie aan Christina Bartels wat op bladsy 2 vertel oor hul vakansie in die dorpie Denmark in Wes-Australië. 
Wintertyd is biltong-, rugby- en rooiwyntyd. En natuurlik soptyd! In hierdie uitgawe verskyn ‘n resep vir biltongsop wat jy eenvoudig net moét probeer! Supersjef Renier wys ons ook hoe om jou eie biltongmaker in ‘n japtrap aanmekaar te slaan. 

Tot volgende keer!


Vir my is herfs ‘n seisoen van dankbaarheid. Ná die uitbundigheid van oënskynlik eindelose somerdae is dit ‘n lafenis om rustiger te word en bestekopname te neem van soveel mooi wat onverdiend in my lewe kom nesskop het. Marga Jordaan het vir ons ‘n pragtige bydrae gestuur oor hoe dankbaar sy is vir haar nuwe lewe in Nieu-Seeland. Heerlike leesstof!

Ek leer steeds daagliks iets nuuts van hierdie pragtige deel van die wêreld. Voor ons migrasie hierheen, was Australië in my geestesoog ‘n uitgestrekte bruinrooi vlakte met enkele droë tolbosse en ‘n paar verdwaalde kangeroes, maar my asem word telkens opnuut weggeslaan deur die verruklike natuurskoon van ons pragtige land. Baie dankie aan Jani Rousseau wat ons bekendstel aan die lieflike Breenhold Gardens in NSW – ‘n lafenis vir die siel! Gaan maak gerus ‘n draai daar.

Draai jou japsnoet jou ‘n rat voor die oë met die immer vernuwende moderne tegnologie? Jy kan die grappies op ‘n stok sit, want daar is hulp! Lees bietjie meer oor die boek No kidding – Why our kids know more about technology than us (and what we can do about it!) wat Yvette Adams geskryf het.

Indien jy nou nog nie ingeteken het op ShowMax nie . . . mis jy uit! As jy gou spring, kan jy die hele winter deur snoesig toegewikkel voor die kassie sit terwyl jy en jou gesin vermaak word met wêreldklas programme. 
Lekker lees!


Met Moedersdag net om die draai kry jy weer die geleentheid om jou ma op die hande te dra. As jy so gelukkig is om haar op dié dag te siene te kry, kan jy haar sommer met heerlike eg Suid-Afrikaanse vlaskywe bederf. Ons kan nou wel nie Cream Crackers in Australië kry nie, maar supersjef Renier du Plessis van Bathurst, New South Wales, het die oplossing gekry met Arnotts se Sao-beskuitjies!
Meimaand is propvol pret! Moenie die lokettreffer Vir Altyd, wat binnekort in teaters in Australië en Nieu-Seeland draai, misloop nie. Kom kuier ook saam met jou Merise-vriendinne in Perth op Vrydag, 29 April. Lu-Marie Sobey gaan gesels oor kreatiwiteit, daar is ‘n snuffelmark, heerlike eetgoed en natuurlik ‘n vriendin wat regtig omgee. Sien jou daar!

kykNET Internasionaal bied jou ‘n kans om vier retoerkaartjies na Suid‐Afrika te wen as jy voor 30 April inteken op ShowMax. Al wat jy moet doen, is om in te gaan op die skakel bit.ly/1qxz8sV en die instruksies te volg. Nie ‘n geleentheid om te versmaai nie! 

Goed gaan tot volgende keer!


Die Australiese son het ons hierdie somer behoorlik laat braai, met temperature van 35 °C en hoër oraloor. Om alles te kroon, het my en manlief se lugversorger die dag voor Kersfees sonder enige waarskuwing gegroet en ons enigste lafenis was die spierwit strande en helderblou waters wat binne gerieflike stapafstand van ons huis geleë is. Ai, dat ons nou so moes suffer!, soos tannie Stienie van Agter Elke Man altyd gesê het.

Hoe het jy hierdie somer oorleef? Laat weet ‘n bietjie!

Baie Suid-Afrikaners wat na Australië verhuis het, woon al tien jaar of langer in die land. Die gesegde “jy kan ‘n persoon uit Afrika haal, maar nooit Afrika uit die persoon nie”, is hier uiters toepaslik. Die bewys hiervan is orals te sien. Ons is so gelukkig om op die oomblik die vertoning van die Manne wat Glo te geniet, en teen die middel van die jaar kom Heuwels Fantasties kuier! Danksy kykNET en ShowMax, het ons nou toegang tot 12 000 Afrikaanse reekse en programme en deur ONStv kan jy Afrikaanse films op jou rekenaar aflaai. 

Daar is baie van ons lesers wie se lewens deur onder andere die grensoorloë van die sewentigs geraak was. Dis so lekker om te sien dat ons oorlogshelde steeds geëer word, al woon ons nou in ‘n ander land. Dankie, SAMVOA, vir julle inisiatief!
Afrikaans is ‘n hartstaal wat wêreldwyd geniet word. Wat ‘n vreugde!

Tot volgende keer.


Die nuwe jaar is reeds in volle swang met al die uitdagings en avonture wat dit inhou. As jy besluit het dat vanjaar die jaar is wanneer jy ‘n werk gaan soek, al het jy baie lank gelede ‘n formele pos beklee, het Merise raad. Lees die artikel oor hoe om ‘n CV oor jou vaardighede te skryf.

Merise skryf graag oor heerlike Afrikaanse kuiers. Laat weet asseblief as jy hoor van Afrikaanse kuiers wat in jou geweste beplan word sodat ons vir ons lesers daarvan kan vertel.

Dit is een van die dae weer Valentynsdag, wanneer verliefdes en spesiale vriende romantiese geskenke en pragtige kaartjies vir mekaar gee. As jy hierdie lees, weet dat jy een van Merise se spesiale vriende is. Ons hoop dat jou Valentynsdag propvol liefdevolle oomblikke sal wees.

En om mee af te sluit: die Australiese dollar is vanjaar 50 jaar oud! Australië het in 1966 van die Australiese pond na die desimale dollar omgeskakel. Vandag is die Australiese dollar een van die sterkste geldeenhede ter wêreld en word die vyfde-meeste verhandel, naas die Amerikaanse dollar, die Euro, die Yen en 
die Britse Pond.

Lekker lees!

Die somervakansie het uiteindelik aangebreek en hopelik kan jy nou ‘n welverdiende blaaskansie geniet. Baie dankie vir jou wonderlike ondersteuning gedurende die jaar. Ons is baie dankbaar om in jou lief en leed te kon deel en saam met jou meer te leer oor die lewe in ons nuwe land.

Lees in hierdie uitgawe oor die Afrika-leeu wat bedreig word en hoe jy kan help. Hierdie uitgawe is ook propvol interessante brokkies oor gewoontes wat rondom kerstyd ontwikkel het. Dit is nie maklik om tuin te maak op hierdie dorre kontinent nie. Merise vertel meer oor die belangrikheid van ‘n goeie deklaag en waarsku ook teen die gevaarlike bakterieë wat daarin kan skuil.

Baie sterkte aan ons voormalige mode-redakteur, Lizelle Hartley, en haar man met die pragtige gastehuis wat hulle in die Swanvallei begin het. Ons wens julle alle sukses toe!Suzelle het geen bekendstelling by ons lesers nodig nie. Kyk ‘n bietjie hoe sy ‘n kersboom sommer 1-2-3 aanmekaar sit!

Merise wens jou en almal wat vir jou spesiaal is ‘n wonderlike, geseënde Kerstyd toe. Mag jy net vreugde en liefde ervaar en mag jou mooiste drome waar word in 2016.

Mooi bly, tot volgende keer!

Afrikaans, Afrikaans, oral Afrikaans . . . in Australië en Amerika, in Nieu-Seeland, in Nederland, Japan, China en Singapoer. Selfs in die Verenigde Koninkryk en die Emirate – ons moedertaal word oral oor gehoor!

Dink net hoe opgewonde CP Hoogenhout sou wees as hy kon beleef hoe sterk ons pragtige taal deesdae staan. In 1941 het hy sy kommer oor die voortbestaan van Afrikaans in die baie bekende gedig “Engels! Engels! Alles Engels! Engels wat jy sien en hoor; in ons skole, in ons kerke, word on moedertaal vermoor”, uitgespreek.  Vandag, byna 75 jaar nadat CP Hoogenhout so mismoedig oor die bedreiging van Afrikaans gevoel het, word feeste ter viering van ons hartstaal wêreldwyd gehou! Lees meer oor twee sulke feeste. Merise skryf ook oor ‘n gastehuis in Auckland, Nieu-Seeland, waar jy in Afrikaans verwelkom word.

Vier Kersfees in Afrikaans! Merise plaas ‘n lys van Afrikaanse kersdienste wat in Australië en Nieu-Seeland gehou word. Weet jy van nog ander Afrikaanse Kersdienste? Stuur asseblief ‘n e-pos na info@merisemedia.com.au sodat dit by die lys gevoeg kan word.

Weet jy wat Uber is? Merise het ‘n bietjie meer daaroor uitgevind – wat dit is, hoe dit werk en hoe dit jou kan help.

Lekker lees tot volgende keer!

Ons nooi jou graag om nuwe dinge saam met Merise te ontdek en om agter die kap van die byl te kom van plaaslike gewoontes in ons nuwe lande. Benjamin Franklin het destyds gesê dat slegs dood en belasting seker is in ons lewe, maar ek verskil van hom.  Ek dink verandering is ‘n onvermydelike sekerheid. 

Soms smag jy na verandering en maak jy seker dat dit gebeur, terwyl jy ‘n ander keer – of jy nou wil of nie – verplig word om aanpassings in jou lewe te maak.

Gelukkig kan jy self kies watter uitwerking verandering op jou lewe sal hê. Dit kan die beste in jou na vore bring, of dit kan jou vernietig.

Daar gebeur goeie en slegte dinge in elkeen se lewe en wanneer dit plaasvind, bring dit verandering mee. Die wenresep is om met dankbaarheid te fokus op die positiewe wat in byna elke situasie voorkom, selfs wanneer dit moeilik is om raak te sien. As jy op die oomblik besig is om verandering te verwerk, byt vas en hou die blink kant bo! Soek vir die mooi om jou en vertrou dat daar goeie dinge voorlê. Die lewe kan wonderlik wees!  Vergun my om uit die Desiderata van Max Ehrmann aan te haal: “Ondanks al die bedrog, voortgeploetery en stukkende drome, is dit steeds ‘n pragtige wêreld. Wees vrolik. Strewe na geluk.”

Koester verandering, want deur verandering kom groei!

Mooi bly tot volgende keer.



Om vars te begin, is darem maar 'n opwindende gebeurtenis! Veral wanneer'n droom waar word en jy die dae kan aftel tot die nuwe dag aanbreek. Maar wanneer 'n groot verandering uit die bloute gebeur en jy na jou asem snak en sukkel omjou balans te hou, is dit'n ander storie.

Die eerste Merise het in 2011 haar verskyning gemaak. Merise is uit'n behoefte gebore - 'n reddingsboei om die seer van migrasie te help stil. Waar die Merise-span soms dalk aan ervaring tekortgeskiet het, het hulle verseker met harde werk en passie geseevier.
Soos jy tereg aflei, is die tema van hierdie uitgawe “om oor te begin’’ Ons kan sterk identifiseer met enigeen wat moet oorbegin- of dit nou 'n vars begin is weens migrasie, 'n nuwe werk, 'n nuwe baba of wat ook al. As jy Elbie van Coller se artikel oor die verskillende fases van migrasie lees, sal jy besef dat hierdie fases ook van toepassing is op enige groot verandering wat jou pad in die I ewe kruis en dat vasbyt en aanhou met jou oë altyd op die einddoel gerig, die antwoord is. As jy aanhou om in die rigting van jou einddoel te beweeg, kan jy nie anders nie as om dlt ulteindelik te bereik. Maar ... in die proses moet jy nie huiwer om hulp te vra wanneer jy dit nodig het nie. Daar is altyd mense wat jou kan en graag sal help, selfs al is dit net om 'n alternatiewe roete aan te beveel.

Hierdie uitgawe is volgepak met interessante artikels en pragfoto's van die plekke waar ons woon en kuier. Kundiges verskaf waardevolle inligting om ons te help om uitdagings te bowe te kom en soos altyd, het ons pragtige modebladsye, smullekker resepte en lekkerleesstories vir elkeen. Bale dankie aan almal wat bydraes gestuur het- dis altyd lekker om van julle te hoor!

Lekker lees tot volgende keer,
Suzette van der Heijden

En so bevind ons ons op die vooraand van Kersfees en op die vooraand van ‘n volgende jaar. In Perth sit swerms galahs (lid van die kaketoe-familie) bedags in die bome en vir aandete sak hulle neer op lowergroen grasperke sodat die pienk en grys spikkels ‘n groot mat vorm. 

Oral in die stad spuit fonteine baldadig die lug in en jong meisies met lang bene stap in die kortste sjoebroekies rond en spog met naeltjieringe en tatoeëermerke op denkbare en ondenkbare plekke. Daar word ure lank gekuier oor ‘n flat white of ‘n long black by ‘n tafeltjie of twee met stoele wat staangemaak is op al wat sypaadjie is.

Vergete is die angstige gejaag van die afgelope jaar wat soos elke vorige jaar ‘n hoogtepunt bereik in die laaste geskarrel voordat families en vriende uiteindelik rustig om ‘n Kersboom bymekaarkom om ‘n salige samesyn te deel.

As ek een belangrike ding kan uitsonder wat ek die afgelope jaar geleer het, is dit dat ons nooit goeie gesondheid as vanselfsprekend mag aanvaar nie. In ons volgepakte, gejaagde lewens gebeur dit so dikwels dat ons nie genoeg tyd afstaan om weer aan te sterk as ons siek was nie. Ons gaan ‘n kundige eers sien wanneer ons nie langer kán voortgaan nie en is daarna woerts-warts weer terug in die tuig. Maar eendag, sommer uit die bloute, haal die werklikheid ons in en is die herstelproses nie meer so vanselfsprekend of so maklik nie. Dis dán wanneer jy gedwing word om te dink aan ‘n lewenstylverandering. Nie dat alle gesondheidsprobleme toegeskryf kan word aan ‘n ongesonde leefstyl nie, maar met ‘n gesonde leefstyl het ons die beste moontlike kans op vinnige herstel.

En dis juis dáárom dat ek jou en jou gesin ‘n geseënde Kersgety en ‘n voorspoedige en veral gesonde Nuwejaar toewens.
Goed gaan tot ‘n volgende keer!

Troues in ‘n nuwe land is maar soos enige ander migrasie-ondervinding –
moenie net aanvaar dat jy weet hoe dit werk nie. Een van die grootste
verskille tussen troues in Australië of Nieu-Seeland en dié in Suid-Afrika,
is dat die huwelikseremonie en -onthaal nie noodwendig direk na mekaar
plaasvind nie. Die seremonie kan dalk in die oggend en die onthaal in die
aand wees of selfs eers die volgende naweek volg. Gaste word ook nie
vanselfsprekend na beide geleenthede genooi nie. As jy wél onder die
bevoorregtes tel wat albei geleenthede mag bywoon, kan daar dalk van jou
verwag word om twee verskillende uitrustings te dra. Maar daar kan ook ander
subtiele verskille wees. Vra gerus vir die plaaslike inwoners as jy onseker voel –
hulle help gewoonlik graag.

In hierdie uitgawe kyk ons na dapperheid. Ons hoop die artikels sal jou inspireer om elke dag met nuwe moed aan te pak, selfs al is dit net om die mooi in elke dag raak te sien en te weet dat die moeilike tye \'n geleentheid bied vir persoonlike groei.

Issue 11

Februarie/Maart 2018

November/Desember 2017 Issue 23

Oktober/November 2017

September/October 2017

October 2017

August/September 2017

Julie/Augustus 2017

Junie/Julie 2017

May/June 2017

April/Mei 2017

Maart/April 2017

Februarie/Maart 2017

November/Desember 2016

Oktober/November 2016

September/Oktober 2016

Merise is a digital family magazine and was started in 2011 to inform, encourage and assist each other as we together face the challenges of settling and integrating into our new community. We talk openly about the different aspects of our lives that take strain through the migration process – from helping our kids to adjust to their new schools to leaving parents behind in another country and changes in the dynamics of our personal relationships.
We provide valuable information about financial and visa matters, inviting specialists to write articles about topics which would be beneficial to our readers. Merise writes about the beauty of our new country by featuring different geographical areas in Australia and New Zealand, thereby giving would-be migrants or readers who are planning holidays or moving interstate a better understanding about what to expect in their new place of residence.
Merise is a new friend to you and your whole family.
The ascending aircraft is symbolic of her desire to reach for the stars. Even her name is symbolic. By dividing the word in two, you get “me rise”, accentuating her desire to make improvements to herself and her life.
It is important for Merise to support her friends, not just newcomers, but all expats in Australia and New Zealand who left their homeland to find new means of livelihood “Down Under”.
Merise lends a hand in almost every way. She’s been through the immigration process and experienced it all first hand. She is thoroughly aware of difficulties that may arise for both newcomers and experienced expats and knows how to overcome, or should we say “survive”, these difficulties.
Merise is vivacious and enthusiastic and lives her life in her new country to the full. She loves exploring and is always on the lookout for new challenges and new experiences. At the same time she enjoys sharing her experiences with her friends, always encouraging and inspiring them.
Merise is fully bilingual and she has English- as well as Afrikaans-speaking friends. She divides her time equally between the two groups of friends and shares the same information with both groups.
You will have to go quite far to find a friend as special as Merise . . .

Download your favorite titles and read them offline, anytime and anywhere

Gift your loved ones with a Magzter Gift Card instantly and give them the freedom to read their favorite magazines and newspapers from thousands of best-selling titles.

Gift your loved ones with a Magzter Gift Card instantly and give them the freedom to read their favorite magazines from thousands of best-selling titles.

Gift your loved ones with a Magzter Gift Card instantly and give them the freedom to read their favorite magazines from {{magCount}} best-selling international titles.

Name

Please fill out this form if you need any help regarding publishing your content on Magzter

Since we launched, Magzter has been committed to partnering with global organizations to provide the greatest possible newsstand technology & service to our customers. Whether you are looking to offer magazine subscriptions to your customer database or just want to learn more, Magzter is committed to helping your business grow. To find out more, please fill out the questionnaire below:

Merise Afrikaans - Oktober/November 2016

Get Merise Afrikaans along with 5,000+ other magazines & newspapers

Get Merise Afrikaans

Magazine Description

In this issue