ലേഡി ഫൈറ്റ് MASTER

ദക്ഷിണേന്ത്യയിലെ ഒരേയൊരു വനിതാ ഫൈറ്റ് മാസ്റ്ററാണ് കൊച്ചി സ്വദേശി കാളി. സിനിമയിലും ജീവിതത്തിലും നേരിട്ട സംഘട്ടനങ്ങൾ അവർ തുറന്നു പറയുന്നു

- ബൈജു ഗോവിന്ദ്

എന്തിനെക്കുറിച്ചു പറഞ്ഞു തുടങ്ങിയാലും ഒടുവിൽ അതൊരു സ്റ്റണ്ട് പടത്തിന്റെ ക്ലൈമാക്സിൽ കൊണ്ടെത്തിക്കുന്നയാളാണു കാളി. ഇതെന്താണ് ഇങ്ങനെയെന്നു ചോദിച്ചാൽ, ഫ്ലാഷ്ബാക്ക് രണ്ടു ഭാഗമായി പറയേണ്ടി വരും. ആദ്യത്തേത്, ഒരു പെൺകുട്ടിയെ പത്താമത്തെ വയസ്സിൽ അയൽവീട്ടിലുള്ളവർ ലൈംഗിക ചൂഷണത്തിന് ഇരയാക്കിയത്. രണ്ടാമത്തേത്, ധന്യ എന്നു പേരുള്ള ആ പെൺകുട്ടി പിന്നീട് കാളി എന്ന പേരിൽ ദക്ഷിണേന്ത്യയിലെ ഒരേയൊരു ലേഡി ഫൈറ്റ് മാസ്റ്ററായി മാറിയത്. സിനിമാക്കഥ പോലെ കാളി പറഞ്ഞതൊക്കെ ചുട്ടുനീറുന്ന മനസ്സുമായല്ലാതെ കേട്ടിരിക്കാനായില്ല. അനാഥയായിരുന്ന പെൺകുഞ്ഞിനെ അവൾക്കു വേണ്ടപ്പെട്ടവർ കൊണ്ടെത്തിച്ചത് ഒരിക്കലും മുറിവുണങ്ങാത്ത വേദനകളിലേക്കായിരുന്നു. സംരക്ഷണം നൽകേണ്ടവർ പിച്ചിച്ചീന്തിയറിഞ്ഞ പെൺ ജീവിതത്തിന്റെ നൊമ്പരം കാളിയുടെ വാക്കുകളിൽ ഇവിടെ കുറിക്കുന്നു.

“ജീവിക്കാനുള്ള ഓട്ടത്തിനിടെ സവിശേഷമായ ചില സാഹചര്യങ്ങൾ വന്നുചേരും. അങ്ങനെയൊരു ജീവിതസാഹചര്യത്തിലാണു ഞാൻ സിനിമയിലെത്തിയത്. കാളി പറഞ്ഞു തുടങ്ങി.

“സ്റ്റണ്ട് മാസ്റ്റർ മാഫിയ ശശിയാണ് ഫൈറ്റിങ് പ്രഫഷനിലേക്ക് എനിക്കു വഴിയൊരുക്കിയത്. ബൈക്ക് ഓടിക്കാനറിയുന്ന പെൺകുട്ടി എന്നുള്ള മേൽവിലാസത്തിൽ ആദ്യമായി ശശി മാസ്റ്ററുടെ മുന്നിലെത്തി. അങ്ങനെയിരിക്കെ, അദ്ദേഹം വീണ്ടും എന്നെ വിളിച്ചു: 'കടലിൽ ചാടാൻ ധൈര്യമുണ്ടോ? തീയിൽ ചാടാനും റെഡിയാണെന്നു ഞാൻ പറഞ്ഞു. കളിമണ്ണ് എന്ന സിനിമയിൽ ശ്വേത മേനോൻ കടലിൽ ഇറങ്ങുന്നതാണു രംഗം. ശ്വേത മേനോന്റെ ഡ്യൂപ്പായി കടലിൽ ഇറങ്ങണം. ശ്വേത മേനോൻ ഇട്ടിരുന്ന ഡ്രസ് എന്നെ ധരിപ്പിച്ചു. സുരക്ഷയ്ക്കായി കാലിൽ കയറു കെട്ടി. പതുക്കെ കടലിലേക്കു നടന്നിറങ്ങി മുങ്ങി നിവർന്നപ്പോൾ ഉടുത്തിരുന്ന വസ്ത്രം ഒലിച്ചുപോയി. ഉൾവസ്ത്രം ധരിച്ചിരുന്നതുകൊണ്ട് നഗ്നത മറയ്ക്കാൻ സാധിച്ചു.

ആ സമയത്ത് അവിടെ ഉണ്ടായിരുന്നവരെ ഞാൻ ചീത്ത പറഞ്ഞു. അടിയിൽ മറ്റു വസ്ത്രം ധരിക്കാതെ വെള്ളത്തിൽ ഇറങ്ങിയാൽ മതിയെന്ന് അവരാണ് എന്നെ ഉപദേശിച്ചത്. ഇവളെന്താ ഇങ്ങനെ എന്നുള്ള ചോദ്യം അവിടെയും ഉയർന്നു. അതിന്റെ കാരണം വിശദീകരിച്ചു പറഞ്ഞു തരാം.

കുട്ടിക്കാലത്തെ നൊമ്പരങ്ങൾ

ഞാൻ ജനിച്ചതും പത്തു വയസ്സു തികയും വരെ ജീവിച്ചതും ഫോർട്ട് കൊച്ചിയിലെ പാണ്ടി കോളനിയിലാണ്. കുട്ടിക്കാലത്ത് അച്ഛനെന്നു വിളിച്ചിരുന്നയാൾ എന്റെ വളർത്തച്ഛനാണെന്നു തിരിച്ചറിയാൻ 32 വർഷം കാത്തിരിക്കേണ്ടി വന്നു.