കോട്ടയം ക്രിസ്മസ്

ക്രിസ്മസ് വിശേഷങ്ങളുമായി മലയാളത്തിന്റെ പ്രിയനടനും സംവിധായകനുമായ കലാഭവൻ ഷാജോണും കുടുംബവും

- വി.ജി.നകുൽ

സ്വീകരണ മുറിയിൽ മനോഹരമായി അലങ്കരിച്ച ക്രിസ്മസ് ട്രീ. ഒപ്പം ഉണ്ണിയേശുവിന്റെയും ക്രിസ്മസ് പാപ്പയുടെയും മാലാഖമാരുടെയും കുഞ്ഞു രൂപങ്ങൾ. എല്ലാത്തിനും തിളക്കം പകർന്നു വർണ ബൾബുകൾ.

കൊച്ചി കലൂരിലെ കലാഭവൻ ഷാജോണിന്റെ ഫ്ലാറ്റിൽ ക്രിസ്മസിനെ വരവേൽക്കാനുള്ള ഒരുക്കങ്ങൾ ഒരുമാസം മുൻപേ തയാർ. സ്നേഹം നിറഞ്ഞ ഒരു "ഹാപ്പി ഫാമിലി'യുടെ മനസ്സു തുടിക്കുന്ന മനോഹരമായ വീട്,

“ഈ കാണുന്നതൊക്കെ ഇവൾ തുന്നിയെടുത്തതാണ് കേട്ടോ.''ഭാര്യ ഡിനിയെ ചേർത്തു പിടിച്ച്, ട്രീയിലെ തുന്നൽ പണികൾ കാണിച്ച് ഷാജോൺ പറഞ്ഞു.

“ഞാൻ ക്രോഷെ വർക്കുകൾ ചെയ്യുന്നുണ്ട്. വിഎച്ച്എസിക്ക് ക്ലോത്തിങ ആൻഡ് എംബ്രോയിഡറിയാണ്പഠിച്ചത്. ഇഷ്ടമുള്ള കാര്യമായതിനാൽ ഇപ്പോഴും തുടരുന്നു. സുഹൃത്തുക്കളെ പഠിപ്പിക്കുന്നുമുണ്ട്. അതു പോലെ നൃത്തം. ഫ്ലാറ്റിലെ പരിപാടികൾക്കൊക്കെ പെർഫോം ചെയ്യും. ഒപ്പം കൊറിയോഗ്രഫിയുമുണ്ട്. ഡിനി പറഞ്ഞു.

മുൻ മിസ് തൃശൂർ ആയിരുന്നു ഡിനി. നർത്തകി, മോഡൽ എന്നീ നിലകളിൽ ശ്രദ്ധേയയായ കാലത്താണു ഷാജോണുമായുള്ള വിവാഹം. പരിചയപ്പെട്ടു പ്രണയം തുറന്നു പറഞ്ഞ് ആറു മാസത്തിനുള്ളിൽ വീട്ടുകാർ തമ്മിൽ സംസാരിച്ചു കല്യാണം ഉറപ്പിച്ചു.

ഈ ക്രിസ്മസിന് മറ്റൊരു സന്തോഷം കൂടിയുണ്ട്. മകൻ യൊഹാൻ അഭിനയിച്ച ആദ്യ സിനിമ സമാധാന പുസ്തകം തിയറ്ററിലെത്തിയതു കഴിഞ്ഞ ജൂലൈയിലാണ്.

“യൊഹാൻ ഒൻപതാം ക്ലാസിലാണ്. അഭിനയവും സിനിമയുമാണ് പാഷൻ, മോൾ ഹന്ന സൈക്കോളജി പഠിക്കുന്നു. പാചകമാണ് ഹോബി. സ്വീറ്റ്സ് ഒക്കെ നന്നായി ഉണ്ടാക്കും. എന്റെ അമ്മച്ചിയും ഡിനിയും പാചകത്തിൽ മിടുക്കരാണ്. ആ രുചിവഴിയിലാണു മോളും.

സംസാരം രുചിവിശേഷങ്ങളിലേക്കു നീങ്ങിയതും ഷാജോണിന്റെ മനസ്സിൽ കോട്ടയത്തെ ക്രിസ്മസ് ഓർമകൾ മുന്തിരി വീഞ്ഞു പോലെ നുരഞ്ഞു. പ്ലം കേക്കിന്റെ വാസന ഹൃദയത്തിൽ നിറഞ്ഞു.

കോട്ടയത്തെ ക്രിസ്മസ് രാത്രികൾ

“ചാച്ചൻ ഇ.ജെ. ജോൺ വിജിലൻസിൽ ഹെഡ് കോൺസ്റ്റബിൾ ആയിരുന്നു. അമ്മച്ചി റെജീന മെഡിക്കൽ കോളജിൽ ഹെഡ് നഴ്സ്, മുട്ടമ്പലത്തെ പൊലീസ് ക്വാർട്ടേഴ്സിലായിരുന്നു കുട്ടിക്കാലം. ഞാനും ചേട്ടൻ ഷിബുവും ഞങ്ങളുടെ കൂട്ടുകാരും ചേർന്നുള്ള ക്രിസ്മസ് കാരളും ആഘോഷങ്ങളുമൊക്കെ ഒരു നിമിഷം കണ്ണടച്ചാൽ ഇന്നലെത്തെപ്പോലെ ഇപ്പോഴും ഉള്ളിൽ തെളിയും.