કશ્મીરની નવી ઓળખ બને છે ચિનાબ બ્રિજ...

સચીન તેન્ડુલકર જમ્મુ-કશ્મીરના રસ્તા પર સ્થાનિક યુવાનો સાથે ક્રિકેટ રમ્યો એ ન્યૂઝની સાથે એવા સમાચાર પણ આવ્યા કે દુનિયા પરના આ સ્વર્ગને દેશના અન્ય હિસ્સા સાથે જોડવા માટેના રેલમાર્ગ પર એક તોતિંગ સેતુ અને એક લાંબા બોગદાને ખુલ્લું મૂકવામાં આવ્યું. ઈજનેરી કૌશલ્યની અજાયબી ગણાતા આ પ્રોજેક્ટને નજીકથી જાણીએ.

- નિતુલ ગજ્જર । ઉમંગ વોરા

જેની ટિકિટોના તોતિંગ ભાવ સાંભળીને મોં આશ્ચર્યથી ફાટી જતું હતું એ વિસ્ટાડોમ કોચ સેન્ટ્રલ રેલવે માટે કમાઉ દીકરો સાબિત થઈ રહ્યા હોવાના આંકડા હમણાં જ આવ્યા. વિસ્ટાડોમ કોચમાં છત કાચની હોય છે અને બન્ને બાજુની કાચની વિન્ડો બહુ મોટી હોય છે, જેથી ચાલુ ટ્રેનમાંથી બહારનાં નયનરમ્ય દશ્યો આસાનીથી જોઈ શકાય છે. પાછલાં વર્ષોમાં રેલવેએ મુંબઈ-અમદાવાદ, મુંબઈ-પુણે, મુંબઈ-ગોવા જેવા અનેક રૂટ પરની ટ્રેનમાં એક-એક વિસ્ટાડોમ કોચ લગાડવાનું શરૂ કર્યું છે.

રેલવેએ આપેલા આંકડા મુજબ મુંબઈ-પુણે રેલમાર્ગ પર દોડતી ટ્રેનોમાં વિસ્ટાડોમ કોચની ઑક્યુપન્સી લગભગ ૧૦૦ ટકા રહી છે. ખંડાલા-લોનાવલા જેવાં ગિરિમથકો વચ્ચેથી પસાર થતો મુંબઈ-પુણે રેલમાર્ગ એના પ્રાકૃતિક સૌંદર્ય માટે જાણીતો છે. એવું જ કોંકણ થઈને મડગાંવ (ગોવા) સુધી જતા રેલ રૂટનું છે. આ માર્ગો પર વિસ્ટાડોમ કોચિસ લોકપ્રિય ન નીવડે તો જ નવાઈ.

હવે આવો લહાવો જમ્મુ-કશ્મીરમાં મળે તો?

વેલ, મળવાનો જ છે, એય થોડા સમયમાં, કારણ કે કશ્મીર ખીણને રેલમાર્ગે દેશના બાકીના હિસ્સા સાથે જોડવામાં મહત્ત્વનાં સાબિત થાય એવાં એક બ્રિજ અને એક ટનલનું લોકાર્પણ હમણાં જ કરવામાં આવ્યું.

૨૦ ફેબ્રુઆરીએ કશ્મીરની એક દિવસીય મુલાકાત દરમિયાન પ્રધાન મંત્રી નરેન્દ્ર મોદીએ વિવિધ ક્ષેત્રની કેટલીક મહત્ત્વપૂર્ણ યોજનાઓનું અનાવરણ કર્યું, એમાંથી સૌથી વધુ આતુરતાથી જેની પ્રતીક્ષા હતી એ મહત્ત્વાકાંક્ષી પ્રોજેક્ટ ચિનાબ નદી માથે બંધાયેલો રેલવે બ્રિજ છે. ચિનાબ નદી હિમાચલ પ્રદેશના લાહોલ વિસ્તારમાંથી ઉદ્ભવી કશ્મીર અને પંજાબ થઈને પાકિસ્તાનમાં વહી સિંધુ નદીમાં ભળી જાય છે. એના પર બંધાયેલા સેતુની ઊંચાઈ જગતની કેટલીક સુપ્રસિદ્ધ ઈમારતો કરતાં પણ વધારે છે, જે આ પુલને એક ઈજનેરી અજાયબી બનાવે છે.