બીમારી લાંબી નહીં ચાલે, પરંતુ કાયમી ઈલાજ જરૂરી

ભારતીય દવાઓ પર અમેરિકી ટેરિફ

- જયેશ ચિતલિયા

ભારત સરકાર અમેરિકા સાથે દ્વિપક્ષીય વેપાર કરાર અંગે વાટાઘાટના એક પછી એક રાઉન્ડ ચલાવી રહી છે ત્યારે અમેરિકા અચાનક અને આડેધડ ટેરિફનાં આક્રમણ કરી દે છે, જે ભારત માટે એક પડકાર ઉપરાંત અનિશ્ચિતતાની પરીક્ષા પણ બની જાય છે.

હજી અમેરિકાના એચ-વનબી વિઝાનું પ્રકરણ ચાલુ છે ત્યાં અચાનક યુએસ પ્રેસિડન્ટ ડોનાલ્ડ ટ્રમ્પ સાહેબે ભારતમાંથી અમેરિકા ખાતે નિકાસ થતી બ્રાન્ડેડ અને પેટન્ટેડ દવા પર સીધી ૧૦૦ ટકા ટેરિફ લાગુ કરવાની જાહેરાત કરીને ભારત સામે ફરી વાર એક પડકાર ઊભો કર્યો છે. આની ખરેખર કેટલી અસર થશે એ હજી લોકો સમજે એ પહેલાં શૅરબજારે તરત જ ભાવોમાં ગાબડાં પાડવાનું શરૂ કરી દીધું હતું, ફાર્મા કંપનીઓના સ્ટૉક્સના ભાવ તૂટતાં આ સેક્ટરની કંપનીઓથી લોકો દૂર થવા લાગ્યા. માર્કેટે તો બીજા ફૅરોના પણ ભુક્કા બોલાવવાનું કામ કરવા માંડ્યું હતું, જે પછીથી રિકવરી તરફ પણ ગયા ખરા.