સમસ્યા વજન વધવાની... ને ન વધવાની!

ખાણી-પીણીનાં નિયંત્રણ ઉપરાંત યોગ, પ્રાણાયામ અને કસરતને પણ રોજની આદત બનાવો.

- હિરવા ભોજાણી

આહાર–વિહારની આ વખતની કૉલમમાં પ્રસ્તુત છે વાચકોના સવાલના જવાબ...

પ્રશ્નઃ હું મોટા ભાગનો સમય ઘરથી બહાર એકલો રહું છું. મને રોજ વૉકિંગની આદત છે, પણ મારું વજન વધતું જાય છે. મારે ખાવા-પીવામાં શું ધ્યાન રાખવું જોઈએ?

વિવેક ગાંધી (વડોદરા)

ઉત્તરઃ આદર્શ રીતે તમારો આહાર હાઈ પ્રોટીન, લો ફેટ તથા મધ્યમ પ્રમાણમાં કાર્બોહાઈડ્રેટ ધરાવતો હોવો જોઈએ. અગર તમે શુદ્ધ શાકાહારી છો તો ઓછા ફૅટવાળાં દૂધ અને દહીંનો ઉપયોગ કરવો. ભૂખ સંતોષવા માટે પ્રોટીનયુક્ત પદાર્થો લો. રાત્રે મગ કે ચણા પાણીમાં પલાળી દો, સવારે એ નાસ્તામાં લઈ શકો. આ હેલ્ધી બ્રેકફાસ્ટ છે એટલે બીજું કંઈ બનાવવાની પણ જરૂર ન રહે. તમે ઈંડાં ખાતા હો તો એને પણ બૉઈલ કરીને લઈ શકો. સ્કિમ્ડ મિલ્કમાં કૉર્નફ્લેક્સ અથવા ગ્રેનોલા ઉમેરીને લઈ શકાય. આ થઈ વાત હેલ્દી નાસ્તાની, જે તમે જ્યાં રહેતા હો ત્યાં તૈયાર કરી શકો.