વણસેલા સંબંધ ઔર બગડશે!

ચીને ચિક્કાર આર્થિક મદદ આપવાની સાથોસાથ પગપેસારો શરૂ કર્યો ત્યારથી માલદીવ્સ એના સાખપડોશી ભારતથી દૂર થતું ગયું છે અને આ અંતર ઓછું થાય એવા સંજોગ અત્યારે તો દેખાતા નથી.

- હીરેન મહેતા

પેટ ચોળીને શૂળ ઊભું કરવાની ઘણાને આદત હોય છે. હિંદ મહાસાગરમાં આપણા લક્ષદ્વીપ ટાપુઓથી થોડે જ દૂર આવેલા માલદીવ્સ દ્વીપસમૂહના આગેવાનો અત્યારે આવી જ હાલતમાં ભેરવાઈ પડ્યા છે. બે મહિના અગાઉ થયેલી (આપણી લોકસભા જેવી) માલદીવ્સની મજલિસ એટલે કે જનપ્રતિનિધિસભામાં બહુમતીએ ચૂંટાઈ આવેલા પ્રમુખ મોહમ્મદ મૂઈઝુ એમના ચીનતરફી ઝોક માટે જાણીતા છે. ભારત માટેની એમની નફરત પણ ઉઘાડી છે. હમણાં મૂઈઝુ સરકારના ત્રણ પ્રધાનોએ વડા પ્રધાન નરેન્દ્ર મોદી વિશે અણછાજતી ટીકા કરી આંતરરાષ્ટ્રીય શિષ્ટાચારની મર્યાદા ઉવેખી છે.

મોદી વિશે જે ટિપ્પણી કરવામાં આવી એ પાછળ કોઈ દેખીતો તર્ક સુદ્ધાં નહોતો. મોદી હમણાં કેરળથી નૈઋત્ય ખૂણે આવેલા લક્ષદ્વીપની મુલાકાતે ગયા અને એના સમુદ્રી કિનારાના કેટલાક ફોટોગ્રાફ્સ મોદીએ સોશિયલ મિડિયા પર મૂક્યા. એમાં તો જાણે આભ તૂટી પડ્યું હોય એમ માલદીવ્સ ના ત્રણ મંત્રીઓએ મોદી પર શબ્દબાણ છોડ્યાં. પેલેસ્ટિન સામેના યુદ્ધમાં મોદી ઈઝરાયલની તરફેણ કરે છે એ મુદ્દે માલદીવ્સના એક પ્રધાને મોદી ની ઈઝરાયલની કઠપૂતળી તરીકે સરખામણી કરી અને એમાં બીજા બે મંત્રી જોડાયા.

એક સ્વતંત્ર દેશના વડા તરીકે મોદીને આંતરરાષ્ટ્રીય સંબંધના મામલે કોઈએ સલાહ આપવાની ન હોય. માલદીવ્સ મુસ્લિમ બહુમતી ધરાવતો દેશ છે અને એ કારણે ત્યાંની પ્રજાની અને પ્રધાનોની સહાનુભૂતિ પેલેસ્ટિન તરફ હોય તો પણ ભારત કે મોદી માટે એવાં કોઈ સમીકરણ બંધનકર્તા નથી અને હોઈ પણ ન શકે. આ કારણસર તો મોદીને ઉતારી પાડવાની ધૃષ્ટતા કરવી એય મૂર્ખામીની ચરમસીમા છે.