ભક્તિની સોયથી સંવેદનાના ધાગે પરોવાયેલી સુવાસ. પ્રભાતનાં પુષ્પો

જીવનનાં અવિરત અને અથાગ વહેણ વચ્ચે અંતરમાંથી પ્રગટેલા પ્રેરણાત્મક વિચારોને વજુ કોટકે શબ્દદેહ આપીને ઉગાડ્યાં પ્રભાતનાં પુષ્પો. હજારો વાચકો માટે દીવાદાંડી સમાન ઠરનારાં આ ફૂલો છ દાયકા પછી પણ કરમાયાં નથી, બલકે હવે અત્તરની જેમ સુવાસ ફેલાવવા માટે ઑડિયો રૂપે રજૂ થઈ રહ્યાં છે. મહાભારતના સમય અર્થાત્ ઉદ્ઘોષક હરીશ ભીમાણીના ઘૂંટાયેલા સ્વરમાં વજુભાઈનાં શબ્દસુમન શ્રોતાઓના આંતરિક જગતને આધ્યાત્મિક આનંદથી ભરી દેવા સક્ષમ છે. અનેક ક્ષેત્રના મહાનુભાવોની ઉપસ્થિતિમાં યોજાયેલા ‘પ્રભાતનાં પુષ્પો’ના ઑડિયો સંસ્કરણના લોકાર્પણનો કેવો રહ્યો કાર્યક્રમ?

- સમીર પાલેજા (મુંબઈ)

આ જગતના બાગમાંથી આપ વિદાય લઈને ગયા પછી આપે ખીલવેલાં પ્રભાતનાં પુષ્પોની વાટિકા જોઈને મેં અનેક વાર વિચાર કર્યો, આ પુષ્પો ચૂંટીને સુંદર માળા બનાવીશ, પણ જ્યારે હું બાગમાં જઈને ઊભી રહેતી ત્યારે પુષ્પોના રંગો જોઈને મારાં ચક્ષુ ભરાઈ આવતાં અને એના મઘમઘાટથી અંતર મહેકી ઊઠતું. એક-એકથી ચડિયાતાં લાગતાં પુષ્પોમાંથી પહેલાં કયું ચૂંટવું અને પછી કયું એના નિર્ણયમાં જ મારું મુગ્ધ મન મૂંઝાઈ જતું.

ચિત્રલેખાનાં સહસંસ્થાપક સ્વર્ગીય મધુરીબહેન કોટકના આ શબ્દો પ્રસિદ્ધ અભિનેત્રી સરિતાબહેન જોશીના સ્વરમાં ગુંજી ઊઠ્યા ત્યારે માત્ર ચિત્રલેખા પરિવાર જ નહીં, પણ કાર્યક્રમમાં ઉપસ્થિત સર્વ મહેમાનોનાં અંતરમાં કૃતજ્ઞતાના ભાવ ઊમટી પડ્યા.

કૃતજ્ઞતા એટલા માટે કે વર્ષો પહેલાં મધુરીબહેને ચિત્રલેખાના સંસ્થાપક સ્વર્ગીય વજુ કોટક લિખિત પ્રભાતનાં પુષ્પોની લેખમાળા પુસ્તક રૂપે રજૂ કરી, જેની પ્રસ્તાવના એમણે પાંખડી એ નામે લખી હતી. હવે એમના પૌત્ર મનન કોટકે અતિ જહેમતથી પ્રભાતનાં પુષ્પોનું ઑડિયો સંસ્કરણ તૈયાર કરાવ્યું છે, જેનું લોકાર્પણ શનિવાર, ૧૦ જૂને મુંબઈના બાન્દ્રા-કુર્લા કૉમ્પ્લેક્સસ્થિત નૅશનલ સ્ટૉક એક્સચેન્જ (એનએસઈ)માં યોજાયેલા એક ઝાકઝમાળભર્યા સમારોહમાં કરવામાં આવ્યું.

આ કાર્યક્રમમાં દીપ પ્રાગટ્ય પછી પ્રસિદ્ધ કથાકાર ભૂપેન્દ્રભાઈ પંડ્યાએ મહારાષ્ટ્ર સરકારના પર્યટન તથા કૌશલ્યવિકાસ ખાતાના પ્રધાન મંગલ પ્રભાત લોઢા, નૅશનલ સ્ટૉક એક્સચેન્જના મૅનેજિંગ ડિરેક્ટર અને સીઈઓ આશિષકુમાર ચૌહાણ, ઉદ્ઘોષક હરીશ ભીમાણી, અદાકાર મનોજ જોષી તથા વક્તા-લેખક જય વસાવડાની ઉપસ્થિતિમાં એનએસસીનો બેલ વગાડીને ઑડિયોરૂપમાં પ્રભાતનાં પુષ્પોનું સંસ્કરણ ડાઉનલોડ માટે ખુલ્લું મૂક્યું. સરળ તત્ત્વજ્ઞાનથી ભરેલી ૧૭૩ મણકાની શ્રેણી એટલે કે પ્રભાતનાં પુષ્પોને ગુજરાતી યુવાનો સુધી પહોંચાડવા માટે હરીશ ભીમાણીના સ્વરમાં ધ્વનિમુદ્રિત કરાયાં છે.