સગીર બાળકો આભાસી દુનિયામાં સહારો શોધે ત્યારે..

દરેક સમસ્યાનો ઈલાજ સોશિયલ મિડિયા પર નથી એ આજની જનરેશનને સમજાવશે કોણ?

- ડૉ. મિતાલી સમોવા

દરેક મનુષ્યને ટોળાની સુરક્ષા સાથે પોતાની વ્યક્તિગત ઓળખ પણ ઊભી કરવી હોય છે. આ વર્તન સામાન્ય અને સાહજિક છે, પણ એ સામાન્ય મનસા વ્યક્તિની ક્ષમતા બહારની મહત્ત્વાકાંક્ષામાં પરિવર્તન પામે ત્યારે સમસ્યા ઊભી થઈ શકે. મહત્ત્વાકાંક્ષા રાખવામાં કશું ખોટું નથી, પણ એ સપનાં પૂરાં કરવા માટે તમે જે જોખમ ખેડવા તૈયાર થયા છો એ કેટલું મોટું છે એનો અંદાજ હોવો જરૂરી હોય છે.

થોડા દિવસ પહેલાંનો આ કિસ્સો. નવમા-દસમા ધોરણમાં ભણતી એક છોકરીએ એના પપ્પાના ફોનમાં પોતાનું ઈન્સ્ટાગ્રામ એકાઉન્ટ બનાવ્યું. પિતાનો ફોન હાથમાં આવે ત્યારે એ પોતાના ફોટોગ્રાફ્સ અપલોડ કર્યા કરે. એક દિવસ કોઈ અજાણ્યા એકાઉન્ટમાંથી એને મેસેજ આવ્યો કે ફોલોઅર્સ વધારવા હોય તો ફલાણા-ઢીંકણા બૅન્ક ખાતામાં અમુક રકમ જમા કરાવીશ તો સામે અમુક હજાર ફોલોઅર્સ વધારી આપીશું.

૧૪-૧૫ વર્ષની કાચી ઉંમરની છોકરીએ સોશિયલ મિડિયા પર ફોલોઅર્સ વધારવાની લાલચમાં આવી જઈને ટુકડે ટુકડે પેલા બૅન્ક એકાઉન્ટમાં પૂરા પંચાવન હજાર રૂપિયા જમા કરાવી દીધા. દીકરીના પિતાએ પોતાના એકાઉન્ટનું બૅલેન્સ ચેક કર્યું અને દીકરીને પૂછપરછ કરી ત્યારે એમને આખા પ્રકરણની ખબર પડી. આ કિસ્સામાં નથી થયું, પરંતુ આવા ઘણા કિસ્સામાં સગીર દીકરી કે દીકરાએ ઠપકો મળવાના ડરે આત્મહત્યા સુદ્ધાં કરી લીધા હોવાના દાખલા છે.