தீபாவளி: செந்தில்- கவுண்டமணி அமர்க்களம்!

தீபாவளி திருநாளையொட்டி கவுண்டமணி, செந்தில் மற்றும் நகைச்சுவை நட்சத்திரங்களின் நகைச்சுவை காட்சிகள் கற்பனை கலந்து பெண்மணி வாசகர்களுக்கு தொகுத்து வழங்கப்படுகிறது கொஞ்சம் சிரித்து மகிழுங்களேன்.....

- 

காட்சி-1

செந்தில் (மந்திரவாதி): ஓம்..... கிரீம்..... ட்ரீம்...... (கண்களை மூடிக்கொண்டு மந்திர உச்சாடனம் செய்கிறார். தன்னை யாருக்கும் அடையாளம் தெரியக் கூடாது என்பதற்காக முகம் முழுவதும் ஒட்டுத்தாடி வைத்திருக்கிறார்)

கோவை சரளா: (செந்தில் முன் வந்து அமர்கிறார்.)

செந்தில்: (நிஷ்டையில் இருந்த செந்தில் மெல்ல கண்ணை திறக்கிறார். கோவை சரளாவை பார்த்ததும் சற்று அதிர்ந்து போகிறார். தன்னை அடையாளம் கண்டு கொள்ளக் கூடாது என்பதற்காக ஜடாமுடியை ஒரு உசுப்பி விடுகிறார்.

கோவை சரளா: இதை பார்த்ததும் அய்யோ ஆத்தாடி (அலறியபடி கண்களை மூடிக்கொண்டு இரு காதுகளையும் இரு கைகளாலும் பொத்திக் கொள்கிறார்.)

செந்தில்: அம்மணி....!

கோவை சரளா:( கண்களை திறந்து பார்க்கிறார்.) நான் அம்மணி இல்லீங்கோ. நல்ல பெண்மணிங்கோ.

செந்தில்: ஆங்..... பேரைச் சொல்லுன்னா. பழைய சினிமா பேரா சொல்லிக்கிட்டு இருக்கே. பேரைச் சொல்லு. உம் பேரைச் சொல்லு.

கோவை சரளா: ஓ...... பேரா..... அஞ்சலை....

செந்தில்: என்னம்மா சொன்ன...... அஞ்சலையா.....

கோவை சரளா: ஊகூம்.... அஞ்சலை தான்...... யாருக்கும் அஞ்சாதவ தான் இந்த அஞ்சலை.

செந்தில்: அம்மா அஞ்சலை.... உன் புருஷனுக்காவது வீட்ல அஞ்சுவியா?

கோவை சரளா: அது கெடக்குது வூட்ல. அதை யாரு கூடவே கூட்டிக்கிட்டு அலையறது. அதனால அதை வூட்ல கட்டிப் போட்டுட்டு வந்துட்டேன்.

செந்தில்: நான் உங்க வீட்டு அல்சேஷன் நாயை கேட்கல. உங்க வூட்டுக்காரரைக் கேட்டேன்.

கோவை சரளா: ஆ.....க்கும் எனக்கு ரெண்டும் ஒண்ணு தான்....

செந்தில்: சரியான ஆம்பளையா இருக்காளே... (வாய்க்குள்ளே முணு முணுக்கிறார்)

கோவை சரளா: என்ன சாமி முணு முணுக்கிறீங்க.... உள்ளுக்குள்ள வேற சிரிக்கிறீங்க....

செந்தில்: நெனைச்சேன் சிரிச்சேன்.

கோவை சரளா: குட்டி யானையை அலங்கரிச்ச மாதிரியில்ல இருக்கீங்க, (கலகலவென சிரிக்கிறார்)