தனித்துவமிக்க தமிழிசை ஆய்வறிஞர் மு.அருணாசலம்!

அருணாசலமும் தனித்துவமிக்கவர் ஆவார். இவருடைய பன்முகங்கள் விவரிக்க முடியாத அளவுக்கு வியப்புக்குரியவை.

- 

அனைத்துத் தமிழ் நெஞ்சங்களும் அவசியம் அறிந்து கொள்ள வேண்டிய ஆளுமை மு.அருணாசலம் ஆவார்.

நாகை மாவட்டத்திலுள்ள திருச் சிற்றம்பலம் என்னும் சிற்றூரில் 1909ஆம் ஆண்டு அக்டோபர் 29-ம் தேதி இவர் பிறந்தார். இவருடைய பெற்றோர் முத்தையா பிள்ளை- கெளரி அம்மாள் ஆவர்.

சிதம்பரம் மீனாட்சி கல்லூரியில் கணிதத்தில் இளங்கலை பட்டம் பெற்றார். கல்லூரி படிப்பை முடித்த கையோடு இவருக்கு அரசு கூட்டுறவுத் துறையில் ஆய்வாளர் வேலை கிடைத்தது. அப்பணியை ஏற்க சென்னைக்கு குடி பெயர்ந்தார். இப்பயணம்தான் இவருடைய வாழ்க்கையில் ஒரு திருப்புமுனையாக அமைந்தது.

சென்னையில், டி. கே. சிதம்பரநாத முதலியார், எஸ். வையாபுரி பிள்ளை போன்ற அறிஞர்களுடன் பழகும் வாய்ப்பு கிடைத்தது. தமிழ் மீது காதல் கொண்டிருந்த அருணாச்சலம், சென்னை பல்கலைக்கழகத் தமிழ் துறை தலைவராக இருந்த வையாபுரி பிள்ளையின் மாணவராகி எம் ஏ (தமிழ்) பட்டம் பெற்றார்.

அரசு பணியில் இருந்து விலகி, காசி இந்து பல்கலைக்கழகத்தில் இரண்டு ஆண்டுகள் தத்துவப் பேராசிரியராக பணியாற்றினார். அப்போது சர்வப்பள்ளி ராதாகிருஷ்ணனின் நட்பு கிடைத்தது. தமிழ் ஆய்வு நூல்களை தேடித் தேடி அலைந்து கொண்டிருந்த மு.அருணாசலத்திற்கு தமிழ்த் தாத்தா உ.வே.சா, திரு.வி.க., மு.வ., கா.சுப்பிரமணிய பிள்ளை, சாமிநாத சர்மா, கல்கி, வ. ராம சாமி ஐயங்கார், கருத்திருமன் போன்ற அறிஞர் பெருமக்கள் நண்பர்களாயினர். தேடல், கற்றல் மற்றும் கேட்டல் வாயிலாக இவருடைய சிந்தனை புதிய பரிமாணத்தை எட்டியது.