ஆதிரை நன்னாளும் ஆதித்தன் திருநாளும் !

திருவாதிரைத் திருவிழா

- மாலதி சுந்தரராஜன்

வேதங்கள் ஆட,மிகு ஆகமமாட,கீதங்கள் ஆட, கிளர் அண்டம் ஏழாட, பூதங்கள் ஆட, புவனம் முழுதாட, நாதங் கொண்டாடினான் ஞானானந்தக் கூத்தே... என்று திருமூலர் வர்ணிக்கும் ஆனந்தத் தாண்டவமாடும் நடராஜப் பெருமானுக்கு உகந்த நாள் ஆதிரை நன்னாள் அதாவது, திருவாதிரை என்று போற்றப்படும் திருநாள்! சிவபெருமானின் நட்சத்திரம் திருவாதிரை. அதனாலேயே அவருக்கு ஆதிரையான் என்ற திருநாமம் உண்டு.

திருவாதிரைத் திருவிழா ஆருத்ரா தரிசன விழாவாக எங்கும் கொண்டாடப்படுகிறது. பஞ்ச பூதங்களுக்கும் ஆதாரமாக இருப்பது எம்பிரான் சிவபெருமானின் ஆனந்த நடனம் தான். அவர் நடனம் தான் உலகை வாழ்விக்கிறது. நமது இயக்கத்தின் ஆதார சுருதியே அவரது இயக்கம்தான்! மார்கழி மாதம் தட்க்ஷிணாயத்தின் இறுதி மாதமாகும். இக்காலத்தில் சுவாமி தரிசனம் செய்வது உத்தமமாகக் கருதப்படுகிறது. மாதங்களில் நான் மார்கழி என்று மாதவன் கூறுவதற்கேற்ப மார்கழி மாத பூஜை பெருமாள் கோவில்களிலும் சிவனார் மனம் குளிர சிவன் கோவில்களிலும் விடியற் காலையில் நடைபெறுவது வழக்கம். இவ்வதிகாலை வழிபாட்டை உலகுக்கு எடுத்துக்காட்டிய பெருமை ஸ்ரீ ஆண்டாள்,  மாணிக்கவாசகப் பெருமான் ஆகிய இருவரையும் சேரும். அவர்கள் இயற்றிய திருப்பாவை, திருவெம்பாவை பாடல்களில் அரியையும் அரனையும் போற்றித் துதித்து அந்த பக்தி மழையில் நம்மையும் நனையச் செய்கின்றனர்.

திருவெம்பாவையில் மாணிக்க வாசகர்,பெண்கள் வீடுவீடாகச் சென்று தோழிகளின் துயில் மயக்கத்தை தெளிவித்து, தேசன், சிவலோகன் தில்லை சிற்றம்பலத்துள் ஈசனார்க்கு அன்பர் யாம் ஆரேலோர் எம்பாவாய் என்று பாடி கருணைக் கடலான தில்லை நாதனை சரணடையச் செய்கிறார். திருப்பாவையில் ஆண்டாள் நாச்சியார் ஓங்கி உலகளந்த உத்தமன்பேர்பாடி பாவை நோன்பு பூண்டு,கோல விளக்கே!, கொடியே!, விதானமே! ஆலின் இலையாய்! அருளேலோரெம்பாவாய் என்று மனமுருகிப் பாடி, பரந்தாமனைக் கைப்பற்றுகிறாள். இரண்டு பாசுரங்களும் பக்தியுடன் மார்கழி நீராடி, இறைவனை அடையும் மேன்மையை எடுத்துரைக்கின்றன.