കാണാക്കാഴ്ചകൾ ! കോക്പിറ്റ് ഡ്രില്ലും DSSSM തത്വവും

ഡ്രൈവിങ് ആരംഭിക്കുന്നതിനു മുൻപ് ചെയ്യേണ്ട മുൻകരുതലുകൾ

- ദിലീപ് കുമാർ കെ.ജി. മോട്ടർ വെഹിക്കിൾസ് ഇൻസ്പെക്ടർ സബ് ആർടി ഓഫിസ്, പെരുമ്പാവൂർ.

ഡിഫൻസീവ് ഡ്രൈവിങ്ങിന്റെ പ്രധാന ഘട്ടം തന്റെ ചുറ്റുമുള്ള കാഴ്ചകൾ പൂർണമായും കാണുന്നു എന്നും താൻ ചെയ്യാൻ പോകുന്ന കാര്യങ്ങൾ മറ്റുള്ളവർക്കു മനസ്സിലായി എന്നും ഉറപ്പു വരുത്തുകയാണ്. വാഹനത്തിന്റെ ദിശ മാറുമ്പോൾ അനുവർത്തിക്കേണ്ട എംഎസ്എം തത്വം നേരത്തേ പറഞ്ഞിട്ടുള്ളത് ഓർക്കുക.

കണ്ണാടിയിൽ ശ്രദ്ധിക്കുകയും അതനുസരിച്ചു മുൻകരുതലുകൾ എടുക്കുകയുമാണ് അടുത്ത പടി. ഇവിടെയാണ് കോക്പിറ്റ് ഡ്രില്ലും DSSSM പ്രിൻസിപ്പിളും പ്രധാനമാകുന്നത്.

കോക്പിറ്റ് ഡ്രിൽ

വാഹനം ഓടിക്കാൻ തുടങ്ങുന്നതിനുമുൻപ് ഡ്രൈവർ ചെയ്യേണ്ട പരിശോധനകളുടെയും നടപടിക്രമങ്ങളുടെയും പരമ്പരയെ സൂചിപ്പിക്കുന്ന വാക്കാണ് കോക്പിറ്റ് ഡ്രിൽ. വാഹനം സുരക്ഷിതമായും നിയന്ത്രണവിധേയമായും ഓടിക്കാവുന്ന അവസ്ഥയിലാണെന്നും യാത്രയ്ക്ക് തയ്യാറാണെന്നും ഉറപ്പുവരുത്തുന്നതിനാണ് ഇത് അനുവർത്തിക്കുന്നത്.

വാഹനത്തിൽ കയറുന്നതിനു മുൻപ്

വാഹനത്തിന്റെ ചുറ്റും അപകടസാധ്യത ഉണ്ടാകുന്ന തരത്തിൽ കുട്ടികളോ മൃഗങ്ങളോ മറ്റു തടസങ്ങളോ ഉണ്ടോ എന്നു നോക്കുക. ടയർ ഉൾപ്പെടെയുള്ള ഭാഗങ്ങൾക്ക് തകരാറുകളോ, ലീക്കേജോ ഇല്ലെന്ന് ഉറപ്പാക്കുക. വാഹനം പാർക്ക് ചെയ്ത ശേഷം ആയിരിക്കാം ചിലപ്പോൾ എന്തെങ്കിലും തടസങ്ങൾ ഉണ്ടാകുന്നത്. അതു കൊണ്ട്, ഓരോ തവണയും വാഹനത്തിൽ കയറുന്നതിനു മുൻപ് ഇത് ആവർത്തിക്കേണ്ടതുണ്ട്.