URBAN SUV

മിഡ്സ് എസ് യു വി വിപണിയിലെ ഹോണ്ടയുടെ ആദ്യ മോഡൽ- എലിവേറ്റ്

- സന്തോഷ്

ഇന്ത്യയിൽ ഹോണ്ടയുടെ ശുഭപ്രതീക്ഷയാണ് എലിവേറ്റ്. സിറ്റിയും അമേയ്സും മാത്രമായി ചുരുങ്ങിയ മോഡൽ നിരയെ പരിപോഷിപ്പിക്കാനുള്ള ആത്മാർഥമായ ശ്രമം. ഇന്ത്യയിലെ സെഡാൻ കാറുകളുടെ വിൽപന ഗ്രാഫ് താഴേക്കായിട്ടു കാലം കുറെയായി. എന്നാൽ, സെഡാനുകളുടെ പ്ലാറ്റ്ഫോമിൽ തന്നെ നിർമിച്ച ചെറു എസ്വികൾക്ക് ദിനംപ്രതി പ്രിയമേറുന്നു. കാഴ്ചയിലെ പകിട്ടും ഉയർന്ന ഇരിക്കും സുരക്ഷിതത്വം കൂടുമെന്ന ധാരണയുമൊക്കെത്തന്നെ കാരണങ്ങൾ. ഈ മേഖലയിലൊരു വാഹനമില്ലാതെ പിടിച്ചുനിൽക്കാനാവില്ലെന്ന ഹോണ്ടയുടെ തിരിച്ചറിവാണ് എലിവേറ്റ്.

ഇങ്ങനെയൊക്കെയെങ്കിലും വലിയൊരു തിരക്കിലേക്കാണ് ഹോണ്ട എലിവേറ്റ് ഓടിയെത്തുന്നത്. ഹ്യുണ്ടയ് ക്രേറ്റ, കിയ സെൽ റ്റോസ്, ഫോക്സ് വാഗൻ ടൈഗൂൺ, സ്കോഡ കുഷാക്, സുസുക്കി ഗ്രാൻഡ് വിറ്റാര, ടൊയോട്ട ഹൈറൈഡർ... കൊറിയയിൽ നിന്നും യൂറോപ്പിൽ നിന്നും സ്വന്തം തട്ടകമായ ജപ്പാനിൽ നിന്നും എത്തുന്ന ഇത്രയും വാഹനങ്ങൾ നിറഞ്ഞു നിൽക്കുന്ന വിഭാഗം. ഈ ചെറു എസ് യു വി വിഭാഗത്തിലെ ആദ്യ ജാതൻ റെനോ ഡസ്റ്ററും നിസ്സാൻ ടെറാനോയുമൊക്കെയായിരുന്നു. പിന്നീട് അതേ പാതയിൽ ബാ ക്കിയുള്ളവരൊക്കെ ഓടിയെത്തി. തെല്ലു വൈകിയെങ്കിലും ഇപ്പോഴിതാ ഹോണ്ടയും.

രൂപകൽപന

ജൂൺ ആറിന് ഇന്ത്യയിൽ ആഗോള അനാവരണം നടത്തിയ എലിവേറ്റ് ഏഷ്യയ്ക്കായുള്ള എസ് യു വി ആണ്. ജപ്പാനിലെ എൻജിനീയർമാരുടെ മേൽനോട്ടത്തിൽ ഇന്ത്യയിലെ യും തായ്ലൻഡിലെയും വിദഗ്ധർ രൂപകൽപന ചെയ്ത് ഏഴാം തലമുറ സിറ്റി പ്ലാറ്റ്ഫോമിൽ നിർമാണം. തുടക്കം മുതൽക്കേ ഇന്ത്യൻ ചിന്തയും കരങ്ങളുമുണ്ടായിരുന്നതിനാൽ എതിരാളികളിൽനിന്നു വിഭിന്നമായി ഇന്ത്യ പരിപൂർണ മുൻതൂക്കമുള്ള വാഹനമാണ് എലിവേറ്റ്. അതുതന്നെയാണ് ഹോണ്ടയുടെ തുറുപ്പുചീട്ട്.