മാറ്റത്തിന്റെ പാതയിലൂടെ വിക്റ്റോറിസ്

5 സ്റ്റാർ സുരക്ഷ, ലെവൽ 2 അഡാസ്, നൂതന ഫീച്ചേഴ്സ്, ഉഗ്രൻ മൈലേജ്. മിഡ്സ് എസ് യു വി വിപണി പിടിച്ചടക്കാൻ മാരുതിയുടെ പുതിയ മോഡൽ വിക്റ്റോറിസ്

- നോബിൾ എം. മാത്യു

മാരുതിയിൽ മാറ്റത്തിന്റെ പേരാണ് വിക്റ്റോറിസ്. വിപണിയിൽ പുതിയ വിജയം കൈപ്പിടിയിലൊതുക്കാൻ മാരുതി ഇറക്കിയ പുതിയ പോരാളി. മിഡ് സൈസ് എസ് യു വി വിഭാഗത്തിൽ ക്രേറ്റയടക്കമുള്ളവരുടെ കുതിപ്പിനു കടിഞ്ഞാണിടാൻ കൃത്യമായ ഗെയിം പ്ലാനോടെയാണ് മാരുതി വിക്റ്റോറിസിനെ കളത്തിലിറക്കിയിരിക്കുന്നത്. ഗ്രാൻഡ് വിറ്റാരയുടെ വിൽപന നെക്സ് ഷോറൂം വഴിയാണെങ്കിൽ വിക്റ്റോറിസ് മാരുതിയുടെ ബജറ്റ് വാഹനങ്ങൾ വിൽക്കുന്ന അരീന വഴിയാണ് ഉപയോക്താക്കളുടെ കയ്യിലെത്തുക. ഡിസൈനിലും സേഫ്റ്റിയിലും ഫീച്ചേഴ്സിലും പുതുമകളുമായാണ് വിക്റ്റോറിസിന്റെ വരവ്. ജയ്പൂരിൽ നടന്ന മീഡിയ ഡ്രൈവിൽ ഓടിച്ചറിഞ്ഞ കാര്യങ്ങളിലേക്ക്...

പപ്പടമല്ല, ഉരുക്ക്

മാരുതി വാഹനങ്ങളെ പപ്പടവണ്ടി എന്നു വിളിച്ചു കളിയാക്കിയവർക്കുള്ള മുഖമടച്ചുള്ള അടിയാണ് വിക്റ്റോറിസിന്റെ 5 സ്റ്റാർ റേറ്റിങ്. ഗ്ലോബൽ എൻക്യാപ്, ഭാരത് എൻ ക്യാപ്പിൽ മുതിർന്നവർക്കും കുട്ടികൾക്കുമുള്ള സുരക്ഷിതത്വ റേറ്റിങ്ങിൽ എതിരാളികളെക്കാളും മുന്നിലാണ് വിക്റ്റോറിസ്.

അഡാസിന്റെ സുരക്ഷിതത്വം

മാരുതി നിരയിൽ ആദ്യമായി അഡാ സ് ഫീച്ചേഴ്സുമായെത്തുന്ന വാഹനമാണ് വിക്റ്റോറിസ്. അഡ്വാൻസ് ഡ്രൈവർ അസിസ്റ്റ് സിസ്റ്റത്തിന്റെ (അഡാസ് ലെവൽ 2) സുരക്ഷിതത്വവും സൗകര്യവും വിക്റ്റോറിസിന്റെ മാറ്റു കൂട്ടുന്നു. ഓട്ടമാറ്റിക് എമർജൻ സി ബ്രേക്കിങ്, ലെയ്ൻ കീപ്പ് അസിസ്റ്റ്, ലെയിൻ ഡിപ്പാർച്ചർ വാണിങ്, അഡാപ്റ്റീവ് ക്രൂസ് കൺട്രോൾ, ബ്ലൈൻഡ് സ്പോർട് ഡിറ്റക്ഷൻ, 360 ഡിഗ്രി ക്യാമറ തുടങ്ങി ഹൈവേ ഡ്രൈവിലും തിരക്കേറിയ റോഡിലും ഡ്രൈവിങ്ങും പാർക്കിങ്ങും സുരക്ഷിതവും ഈസിയുമാക്കുന്ന സംവിധാനങ്ങൾ വിക്റ്റോറിസിലുണ്ട്.

എസ് യു വിയോ സ്റ്റേഷൻ വാഗണോ?