AIR ഇനിയില്ല, ആകാശവാണി മാത്രം

ഓൾ ഇന്ത്യ റേഡിയോ ഇനി ആകാശവാണി എന്ന പേരിൽ മാത്രമായിരിക്കും അറിയപ്പെടുക. തുടക്കത്തിൽ ഇന്ത്യൻ സ്റ്റേറ്റ് ബ്രോഡ്കാസ്റ്റിങ് സർവീസ് എന്ന് അറിയപ്പെട്ടിരുന്ന പ്രക്ഷേപണ രംഗത്തിന് ഓൾ ഇന്ത്യ റേഡിയോ എന്നും ആകാശവാണി എന്നുമൊക്കെ പേരുണ്ടായതിനുപിന്നിൽ കൗതുകകരമായ ചരിത്രമുണ്ട്

- ഡോ. ജോബിൻ ജോയ്

റേഡിയോയിൽ This is All India Radio എന്ന് തുടങ്ങിയിരുന്ന ഇംഗ്ലീഷ് വാർത്തകൾ കഴിഞ്ഞ ദിവസം മുതൽ This is Akashavani എന്നു കേട്ടപ്പോൾ പതിവ് ശ്രോതാക്കളിൽ ചിലരെങ്കിലും നെറ്റി ചുളിച്ചുകാണും. ഇന്ത്യയിലെ സർക്കാർ നിയന്ത്രിത റേഡിയോ പ്രക്ഷേപണശൃംഖല ഇനിമുതൽ അറിയപ്പെടുക ആകാശവാണി എന്നുമാത്രമാണ്. ആകാശവാണിയുടെ ഡയറക്ടർ ജനറലിന്റെ കാര്യാലയം പുറപ്പെടുവിച്ച ഈ ഉത്തരവ് മേയ് മൂന്നിന് ഔദ്യോഗികമായി നിലവിൽവന്നു.

ലോകത്തിലെ ഏറ്റവും വലിയ റേഡിയോശൃഖലകളിൽ ഒന്നായ പ്രസാർ ഭാരതിയുടെ കീഴിൽ പ്രവർത്തിക്കുന്ന ഓൾ ഇന്ത്യ റേഡിയോ ഇനി ആകാശവാണി എന്ന ബ്രാൻഡിൽ മാത്രമായിരിക്കും അറിയപ്പെടുക. വാർത്താവിതരണ പ്രക്ഷേപണ മന്ത്രാലയത്തിന്റെതാണ് തീരുമാനം. ഇനിമുതൽ പൊതുസംവിധാനത്തിലുള്ള റേഡിയോ നിലയങ്ങളെല്ലാം ‘ഓൾ ഇന്ത്യ റേഡിയോയ്ക്കുപകരം, ആകാശ വാണി എന്ന പൊതുനാമത്തിൽ ഏകീകൃതമായിരിക്കുമെന്ന് ചുരുക്കം.

23 ഭാഷകളിലും 146 ഗ്രാമ്യഭാഷകളിലും (Dialects) വിവിധങ്ങളായ പ്രോഗ്രാമുകളും ലക്ഷക്കണക്കിന് ശ്രോതാക്കളുമുള്ള ഓൾ ഇന്ത്യ റേഡിയോ കൊളോണിയൽ കാലഘട്ടത്തിന്റെ ഓർമകൾ പേറുന്ന ഒരു പേരാണ് മാറ്റുന്നത്. തികച്ചും പ്രാദേശികമായ ആകാശവാണിയിലേക്ക് പേര് മാറുമ്പോൾ ഈ പേരുകളുമായി ബന്ധപ്പെട്ട് ഉണ്ടായ രസകരമായ സംഭവങ്ങളും അറിഞ്ഞിരിക്കേണ്ടതാണ്.

AIR വന്ന വഴി