வெற்று சாகசம்: முதல்வன்

ஒரு திரைப்படத்தை அர்த்தம் உள்ளதாக்குவது அந்த திரைப்படம் பற்றிய பேச்சுகள்தான்.

-  தா. பிரகாஷ்

1999இல் வெளியான 'முதல்வன்' திரைப்படத்துக்கு அப்படியொரு வாய்ப்பு அமைய ‘ஒரு நாள் முதல்வன்' என்ற கதையும், அப்போதிருந்த அரசியல் சூழலுமே காரணம்.

சென்னையில் தொலைக்காட்சியில் வேலை பார்க்கும் புகழேந்திக்கு (அர்ஜுன்) முதலமைச்சர் அரங்கநாதரை (ரகுவரன்) பேட்டி எடுக்கும் வாய்ப்பு கிடைக்கிறது. அவரின் கிடுக்குப்பிடி கேள்வியால் கோபம் தலைக்கேறி, “இது சாத்தியம்னா... தயார்” என்பார் 28 வயதான புகழேந்தி.

பதவியேற்பு விழா நடந்தபிறகு, அவர் எடுக்கும் அதிரடி நடவடிக்கைகளுக்கு மக்கள் மத்தியில் வரவேற்பு கிடைக்க, தேர்தலில் 'பழம் தின்னு கொட்டை போட்ட' அரசியல்வாதிகள் மண்ணைக் கவ்வுவார்கள். பிறகு புகழேந்தி ஆட்சியில் நாடு (படத்தில் மாநிலம் என்ற வார்த்தையைப் பெரும்பாலும் பயன்படுத்தவில்லை) வளம் பெறுகிறது.

படத்தலைப்பிலேயே இயக்குநர் ஷங்கரின் படைப்புத்திறன் வெளிப்பட்டிருக்கும். U.K.வின் கொடி முதலிலும், பிறகு மற்ற நாடுகளின் கொடிகளும் கூட்டாகச் சேர்ந்து 'முதல்வன்' என்று தலைப்பு திரையில் விரியும். கதை, திரைக்கதை, கதாபாத்திர உருவாக்கம், பிரமாண்டம் என எல்லாவற்றிலும் சிக்ஸர் அடித்த இயக்குநர், படத்தில் இடம்பெற்ற ஆறு பாடல்களையும் கண்ணுக்கும் காதுக்கும் விருந்தளிக்கும் விதமாக எடுத்திருப்பார். ஏ.ஆர். ரஹ்மானின் இசையும், கே.வி. ஆனந்தின் ஒளிப்பதிவும் எப்படி இருக்கும் என வாசகர்களுக்கு சொல்லித்தெரிய வேண்டியதில்லை.