അമ്പോ അംബാനി

പുതിയ കാലത്ത് കല്യാണം ഒറ്റ ദിവസത്തെ ഒരു ചടങ്ങു മാത്രമല്ല. ആഴ്ചകളും മാസങ്ങളും നീണ്ടു നിൽക്കുന്ന മഹാമേളമാണ്

- വിജീഷ് ഗോപിനാഥ്

വിവാഹമല്ല, മാസങ്ങൾക്കു മുൻപു നടന്ന പ്രീവെഡ്ഡിങ് ചടങ്ങിന്റെ വിശേഷം കേട്ടാൽ തന്നെ എങ്ങനെ ഞെട്ടാതിരിക്കും? മൂന്നു ദിവസം നീണ്ടു നിന്ന ഇവന്റ് ചെലവ് ഏതാണ്ട് 1000 കോടിക്കു മുകളിൽ. മൂന്നു ദിവസം വിളമ്പിയത് 2500 വിഭവങ്ങൾ അതിൽ പേഡ മുതൽ ജാപ്പനീസ് രുചികൾ വരെ.

വിവാഹത്തിൽ പങ്കെടുക്കാൻ ലോകത്തിന്റെ വിവിധ ഭാഗങ്ങളിൽ നിന്ന് അതിഥികൾ എത്തുന്നതു കൊണ്ട് ഗുജറാത്ത് ജാംനഗർ വിമാനത്താവളത്തിന് പത്തു ദിവസത്തേക്ക് അന്താരാഷ്ട്ര പദവി. നാലുദിവസത്തിനുള്ളിൽ എത്തിയതു നാന്നൂറു സ്വകാര്യ വിമാനങ്ങൾ. ബിൽഗേറ്റ്സ്, സക്കർബർഗ്, സുന്ദർ പിച്ചെ മുതൽ ലോകത്തെ പ്രമുഖർ എല്ലാം എത്തുന്നു. പ്രശസ്ത പോപ് ഗായി ക റിയാനയുടെ സംഗീത വിരുന്നായിരുന്നു പ്രധാന ഇവന്റ്. എഴുപത് കോടി രൂപയാണ് പ്രതിഫലം എന്ന് റിപ്പോട്ടുകൾ...

ചടങ്ങിനു നിറം കൂട്ടാൻ ബോളിവുഡ് ഒഴുകിയെത്തുന്നു. ആമിർഖാനും സൽമാൻ ഖാനും ഷാരൂഖ് ഖാനും ചുവടുവയ്ക്കുന്നു. ഇത്രയൊന്നും വേണ്ട, എങ്കിലും കളർഫുൾ ആയി വിവാഹച്ചടങ്ങൊരുക്കാൻ നമ്മളും ആലോചിച്ചു തുടങ്ങിയിരിക്കുന്നു.

ഒരു ദിവസത്തിൽ ഒതുങ്ങുന്നതല്ല ഇന്നു വിവാഹം. നാലും അഞ്ചും ദിവസങ്ങളിലേക്ക് അതു വളർന്നു കഴിഞ്ഞു. ന്യൂജെൻ കളർഫുൾ കല്യാണ മഹോത്സവം അടുത്ത പേജുകളിൽ...

ഹൽദി- മെഹന്ദി

വിവാഹ ചടങ്ങുകൾക്ക് മുഹൂർത്തവും സമയവും ചിട്ടകളും ഒക്കെ ഉള്ളതു കൊണ്ടു തന്നെ ടെൻഷനും മസിലു പിടുത്തവും കൂടുതലായിരിക്കും. വധുവും വരനും ചിരിക്കുന്നുണ്ടെങ്കിലും അതു ശരിക്കുള്ള ചിരിയല്ല പ്രത്യേക തരം ആക്ഷനാണെന്ന് കല്യാണം കഴിച്ചവർക്ക് മനസ്സിലാകും.