சென்றது போகுக; தீவினை அகலுக!

இனிய தோழர்! நலம்தானே? கடந்த மாதத்தில் மட்டும் தமிழ்நாட்டிலும் இந்தியாவிலும் நடைபெற்ற சம்பவங்கள் ஏற்கனவே நொந்து களைத்துப் போன பாமரனை மேலும் மேலும் நிலை குலைய வைத்திருக்கின்றன.

- கண்மணி கேளடி

தமிழ்நாட்டின் காவல் துறை சித்திர வதைகள் மற்றும் மரணங்கள். கைது செய்யப்பட்டவரிடம் விசாரணை நடத்து வது குறித்து உச்ச நீதிமன்றம் பலப் பல வழக்குகளில் தெளிவுபடுத்தி இருக்கிறது. ஆனாலும் தொடர்ந்து காவல் மரணங்கள் ஏற்பட்டபடியே இருக்கின்றன. சிவகங்கை மாவட்டம் மடப்புரத்தில் நடந்திருக்கும் அஜித்குமார் கொலை தமிழ்நாட்டு மக்களை அதிர வைத்திருக்கிறது. அதிலும் இந்த படுகொலையை நிகழ்த்தியவர்கள் தமிழக காவல்துறை ஆட்கள் என்பது அதிர்ச்சி மேல் அதிர்ச்சி.

விசாரணையின் போது யாரையாவது கொலை செய்யும் அதிகாரத்தை காவல்துறைக்கு யாரும் வழங்கவில்லை. பிரேத பரிசோதனை அறிக்கையை பரிசீலனை செய்த நீதிமன்றம் இதை படுகொலையிலும் மோசமான படுகொலை என்று கூறியது. உடம்பில் எந்த இடத்தையும் விட்டு வைக்காமல் மொத்தம் 64 காயங்கள் இருந்ததாக கூறும் இந்த அறிக்கை மோசமான வழக்குகளை தினம் தினம் சந்திக்கும் நீதிமன்றத்தையே அதிரவிட்டிருக்கிறது என்றால் நாமெல்லாம் எம்மாத்திரம்?

ஆட்சிகள் மாறினாலும் காட்சிகள் மாறுவதில்லை. இப்போது திமுக, அதற்கு முன்னால் அதிமுக என்று இரண்டு ஆட்சி காலத்திலும் சேர்த்து 25 பேர் காவல்துறையால் சித்திரவதை செய்து கொல்லப்பட்டிருக்கிறார்கள். எப்போதுமே இராணுவமும் போலீசும் அரசாங்கத்தின் படைகள் தான். மன்னன் சொன்னால் போய் போர் புரிபவை தான். ஆனால் இது ராஜாக்களின் காலமா என்ன? உலகின் பெரிய ஜனநாயக நாடு இந்தியா. காவல்துறை உங்கள் நண்பன் என்று பெரிய பெரிய விளம்பரங்கள் மூலம் மக்களை நெருங்க விரும்பும் அரசுகள் என்றுதானே இவர்கள் காட்டிக் கொள்கிறார்கள்?