ഉപാസനയുടെ ഷഷ്ഠിപൂർത്തി

മണക്കാട് പരമേശ്വരൻ നമ്പൂതിരി കൂടൽമാണിക്യ സ്വാമിയെ സേവിച്ചു തുടങ്ങിയിട്ട് ആറ് പതിറ്റാണ്ടോളമാകുന്നു

- ബാബുരാജ് പൊറത്തിശ്ശേരി 9846025010

മണക്കാട് പരമേശ്വരൻ നമ്പൂതിരി കൂടൽമാണിക്യ സ്വാമിയെ സേവിച്ചു തുടങ്ങിയിട്ട് ആറ് പതിറ്റാണ്ടോളമാകുന്നു. 1964 ൽ തുടങ്ങിയ സേവ ഇന്നും തുടർന്നുകൊണ്ടേയിരിക്കുന്നു. ഇത്രയും വർഷം സ്വാമിയെ സേവിക്കാൻ അവസരം നൽകിയതിന് തീരാത്ത കടപ്പാടാണ് സ്വാമിയോട് ഇദ്ദേഹത്തിന്.

ആ കാലയളവിൽ പുത്തില്ലത്ത് നാരായണൻ നമ്പൂതിരിയായിരുന്നു മേൽശാന്തി. മുട്ടു ശാന്തി, പരികർമ്മം പാരമ്പര്യ അവകാശികളാണ് മണക്കാട് കുടുംബക്കാർ. പരമേശ്വരൻ നമ്പൂതിരിക്കുമുമ്പ് അച്ഛൻ മണക്കാട് കൃഷ്ണൻ നമ്പൂതിരിയായിരുന്നു പരികർമ്മി. അച്ഛന്റെ മരണശേഷം ആ ചുമതല സ്വയം ഏറ്റെടുക്കുകയായിരുന്നു ഇദ്ദേഹം. പരമേശ്വരൻ നമ്പൂതിരിയുടെ മക്കളായ അഖിൽ നമ്പൂതിരി, നിഖിൽ നമ്പൂതിരി എന്നിവർ അച്ഛന് കൂട്ടായി കൂടൽമാണിക്യസ്വാമിയെ സേവിക്കാനായി കൂടെയുണ്ടാകും.

മേൽശാന്തിയായിരുന്ന പുത്തില്ലത്ത് വാസുദേവൻ നമ്പൂതിരി പ്രായാധിക്യം മൂലം അന്തരിച്ചപ്പോൾ തുടർച്ചയായി മൂന്നു വർഷത്തോളം മേൽശാന്തിയായി തുടർന്നു പരമേശ്വരൻ നമ്പൂതിരി. അതും പുറപ്പെടാശാന്തിയായിട്ട്. പിന്നീട് ഒന്നിടവിട്ട മാസങ്ങളിൽ അനവധിക്കാലം മേൽശാന്തിയായിരുന്നു ആദരപൂർവ്വം ഭക്തജനങ്ങൾ മണക്കാട് എന്നു വിളിക്കുന്ന പരമേശ്വരൻ നമ്പൂതിരി.

കളഭം, ഉത്സവം, പ്രതിഷ്ഠാ ദിനം എന്നിവയ്ക്ക് വളരെയേറെ ഉത്തരവാദിത്വമുള്ളത് പരികർമ്മികൾക്കാണ്.(തന്ത്രിമാർക്ക് പൂജയ്ക്കാവശ്യമായ സാധനങ്ങൾ ഒരുക്കിക്കൊടുക്കുക) ഇവിടെ മറ്റ് ക്ഷേത്രങ്ങളിൽ നിന്നും വ്യത്യസ്തമായി ആറ് തന്ത്രികുടുംബങ്ളാണുള്ളത്. ശബരിമലയിൽ താഴമൺ കുടുംബവും ഗുരുവായൂർ ചേന്നാസ് കുടുംബവും മാത്രമാണ് തന്ത്രിമാർ.