ചിത്രഗുപ്തന്റെ കണക്കുപുസ്തകം

കാലത്തിന്റെ കണക്കു ബുക്കിൽ ബാക്കിയിരിക്കണ്ടവർ ആരുമില്ല. സൃഷ്ടി ബ്രഹ്മാവിനും സ്ഥിതി മഹാവിഷ്ണുവിനും സംഹാരം ശിവനും പണ്ടേ വിഭജിച്ചു കൊടുത്തതാണ്.

- ശങ്കരാടിൽ മുരളി 9074507663

ഇടക്കാലത്ത് വിശ്വാമിത്രൻ ബഹളം കൂട്ടി ബ്രഹ്മാവിന് പ്രതിഛായ പോരാ, തനിക്കും കുറെക്കാലം സൃഷ്ടി നടത്താൻ അവസരം വേണമെന്ന് വാദിച്ചു. മന്ത്രിസഭ വീഴുമെന്നായപ്പോൾ എല്ലാവരും കൂടി ഏകോപനസമിതി ചേർന്ന് പരീക്ഷണാടിസ്ഥാനത്തിൽ സൃഷ്ടി നടത്താനുള്ള അവകാശം മൂന്നേമുക്കാൽ നാഴിക വിശ്വാമിത്രന് നൽകി.

അങ്ങനെ വിശ്വാമിത്രൻ സൃഷ്ടി തുടങ്ങി. ആദ്യം സസ്യലോകത്ത് കൈവച്ചു. അതുവരെയില്ലാത്ത സ്വാദും മണവും വീര്യവുമായി ഒരു പഴം ഉണ്ടാക്കി. എല്ലാ ഫലങ്ങൾക്കും വംശവർദ്ധനവിനായി കുരു, അല്ലെങ്കിൽ വിത്ത് ഉണ്ടാവും. വിശ്വാമിത്രൻ സൃഷ്ടി കഴിഞ്ഞപ്പോൾ അതിനകത്ത് വിത്ത് വെയ്ക്കാൻ മറന്നു. ഉടനെ വിത്ത് പഴത്തിന് പുറത്ത് ഫിറ്റ് ചെയ്തു. അതാണ് കശുമാങ്ങ അഥവാ പറങ്കിമാങ്ങ. ആകെ നാണക്കേടായി. ബ്രഹ്മാവ്പൊട്ടിച്ചിരിച്ചു. വിശ്വാമിത്രൻ കുലുങ്ങിയില്ല.

അടുത്തത് പക്ഷിലോകത്തേക്ക് കടന്നു. അതുവരെയാരും കാണാത്ത വേഗതയും ശക്തിയുമുള്ള ഒരു പക്ഷിയെ സൃഷ്ടിച്ചു. സൃഷ്ടി കഴിഞ്ഞപ്പോൾ പക്ഷിക്ക് കാലുകളില്ല. തല കീഴായി തൂങ്ങിക്കിടക്കണം. അതാണ് വവ്വാൽ അല്ലെങ്കിൽ വാവൽ. അതും സൃഷ്ടി വൈകൃതമായി.