દિવાળીમાં બનાવો સૌને ભાવતાં આ વ્યંજન

બધાં પર્વોમાં શિરમોર એવો તહેવાર આવી રહ્યો છે, તમે છો તૈયાર એને સ્વાદિષ્ટ આવકાર આપવા?

- ગરિમા બ્રહ્મભટ્ટ

દિવાળીને હવે ગણતરીના દિવસો જ બાકી છે, ઘરની સાફસફાઈ કર્યા પછી મિષ્ટાન્ન અને ફરસાણમાં નવું શું બનાવીએ એ વિચાર લગભગ દરેક મહિલા માટે યક્ષ પ્રશ્ન બની જાય છે. ત્યારે પ્રિયદર્શિની એની સખીઓ માટે લઈને આવી છે એવાં બે વ્યંજન જે ગુજરાતની ફેમસ ડિશ પણ છે, સાથે જ નાનાથી લઈને મોટા બધાંને મનપસંદ છે.

તો ચાલો જાણીએ, ઘરે કંદોઈ જેવો જ ક્રિસ્પી મોહનથાળ અને મસાલા ભાખરવડી બનાવવાની યુનિક રીત.

મોહનથાળ

સામગ્રી

ત્રણ કપ (પ૦૦ ગ્રામ) ચણાનો કરકરો લોટ, પ૦૦ ગ્રામ દેશી ઘી, એક કપ દૂધ, ૪૦૦ ગ્રામ સાકર, કેસરના દસ-બાર તાંતણા, એક ચમચી જાયફળનો પાવડર, એક ચમચી એલચી પાવડર, ઑરેન્જ ફૂડ કલર એક ચમચી, મગજતરી એક ટેબલ સ્પૂન, પાણી જરૂર પ્રમાણે (ચાસણી બનાવવા માટે).

રીત

*સૌપ્રથમ ચણાના લોટને સારી રીતે મોટા વાસણમાં ચાળી લો.

*ત્યાર બાદ એમાં જરૂર પ્રમાણે દૂધ અને ઘી ઉમેરીને ધાબો (હાથેથી બરાબર મસળીને મિક્સ કરવું) આપી દો.

*અડધો કલાક માટે આ ધાબો આપેલા લોટને એક બાજુ ઢાંકીને મૂકી દો. બીજી બાજુ, દૂધમાં કેસરના તાંતણા પલળવા માટે મૂકો.

* જ્યાં સુધી લોટ બરાબર મિક્સ થાય ત્યાં સુધી એક મોટી તપેલીમાં સાકર ડૂબે એટલું પાણી લઈને ધીમા ગૅસ પર ચાસણી બનાવો.

* એમાં એક ચમચી ઑરેન્જ ફૂડ કલર ઉમેરો. ચાસણી ઘટ્ટ થાય એટલે આંગળીનાં ટેરવાં પર રાખીને ચેક કરો. જો દોઢ તારની ચાસણી બની ગઈ હોય તો ગૅસ બંધ કરો.

*યાદ રાખો, ચાસણી વધારે તારની બની જશે તો મોહનથાળ ખાવામાં નરમ નહીં બની શકે. મોહનથાળ બનાવતી વખતે ચાસણી પરફેક્ટ બનવી જરૂરી છે.

ચાસણી બની ગયા પછી એને ગૅસ પરથી નીચે ઉતારી લેવી. ત્યાર પછી ધાબો દીધેલા લોટને એક વખત ફરી સારી રીતે ચાળી લેવો. (મોહનથાળને કંદોઈ જેવો કણીદાર બનાવવાની આ સિક્રેટ ટિપ્સ છે.)