તન કી શક્તિ... મન કી શક્તિ

કસરત એ શારીરિક અને માનસિક સ્વસ્થતા જાળવવાનો સૌથી સરળ અને સસ્તો રસ્તો છે.

- ડૉ. અપર્ણા દેશમુખ

તમે ગમે એટલા શ્રીમંત હો તો પણ સારું સ્વાસ્થ્ય તમે ખરીદી નહીં શકો. પૈસો ગમે એટલો હોય તોય તમારા શારીરિક ફાયદા માટે કસરત કરવા તમે કોઈ બીજાને નોકરી પર ન રાખી શકો. એ પ્રયત્ન તો તમારે જ કરવા પડે. કહેવાય છે કે સ્વાસ્થ્ય એ સૌથી મોટી સંપત્તિ છે, પણ એ માટે તમારે આર્થિક દૃષ્ટિએ સંપત્તિવાન હોવું જરૂરી નથી.

નિયમિત વ્યાયામ એ માનસિક સ્વાસ્થ્ય સુધારવા માટેનો પણ એક શ્રેષ્ઠ માર્ગ છે. સક્રિય જીવનશૈલી ધરાવતા લોકોનું શારીરિક તેમ જ માનસિક સ્વાસ્થ્ય સારું હોય છે.

નિયમિત કસરતના માનસિક સ્વાસ્થ્ય પર થતા ફાયદા...

*તણાવ અને ચિંતાનું પ્રમાણ ઘટે છેઃ માનસિક તણાવને લીધે શરીરના સ્નાયુ તંગ થઈ જાય છે. નિયમિત કસરત કરવાથી સ્નાયુઓ આરામ અનુભવે છે. મન અને તન એકમેક સાથે સંકળાયેલાં છે એટલે શરીર રિલેક્સ થાય ત્યારે મન પણ તણાવમુક્ત થઈ જાય છે.

* ડિપ્રેશનનાં લક્ષણો દૂર કરવામાં મદદ થાય છેઃ નિયમિત કસરત કરવાથી હળવી તીવ્રતાના ડિપ્રેશનમાં લક્ષણોમાં ઘટાડો દેખાય છે. કસરતને લીધે વ્યક્તિ શાંતિ અનુભવે છે, એનો મૂડ સુધરે છે અને નકારાત્મક વિચારો ઓછા થાય છે. કસરત કરતી વખતે મગજમાં અમુક રસાયણોનો સ્રાવ વધે છે.