અમેરિકા કેમ આપે છે ભારતવિરોધી માહોલને હવા?

મોદી-બાઈડનની મુલાકાતના કલાકો પહેલાં અમેરિકી પ્રશાસને ખાલિસ્તાની વિભાજનવાદીઓ સાથે મસલત કરી, જેને કારણે થોડા દિવસ અગાઉ રાહુલ ગાંધીએ અમેરિકામાં જ શીખ સમાજની કથિત અવદશા વિશે કરેલાં બેફામ વિધાનોને જાણે સમર્થન મળી ગયું!

- હીરેન મહેતા

જો બાઈડન પ્રમુખપદેથી વિદાય લે એનાં થોડાં સપ્તાહ પૂર્વે જ વડા પ્રધાન નરેન્દ્ર મોદી અમેરિકાની મુલાકાત લઈ પાછા ફર્યા છે. એશિયા-પેસિફિક વિસ્તારમાં ચીનના વધતા પ્રભાવને ખાળવાના મુખ્ય ઉદ્દેશ સાથે જેની રચના થઈ છે એ QUAD સમૂહના દેશ-અમેરિકા, જપાન, ઑસ્ટ્રેલિયા અને ભારતના આગેવાનોની શિખર પરિષદમાં હાજરી આપવા ઉપરાંત મોદી પેલેસ્ટિનના પ્રમુખ મહમૂદ અબ્બાસને પણ મળ્યા. લોકસભાની ચૂંટણીમાં ભાજપને ખાસ્સો માર પડ્યો હોવા છતાં અમેરિકાવાસી ભારતીયોમાં વડા પ્રધાન નરેન્દ્ર મોદીની લોકપ્રિયતા યથાવત્ રહી છે એનો સાક્ષાત્કાર પણ એમણે મેળવી લીધો.

મોદી-બાઈડન: દોસ્તીનો દાવો, પણ કરતૂત...

રાહુલના બખાળા સામે શીખ સમાજનો વિરોધ.

પેલેસ્ટિનના ગાઝા પટ્ટી વિસ્તાર પર વર્ચસધરાવતા આતંકી જૂથ હમસ દ્વારા ઈઝરાયલ પરના મિસાઈલ હુમલાને એક વર્ષ પૂરું થવામાં છે (સાત ઑક્ટોબર) ત્યારે ઈઝરાયલ હમસની સાથોસાથ ઔર એક ઉગ્રવાદી સંગઠન હેઝબુલ્લાહની સમગ્ર નેતાગીરીનો ઘડોલાડવો કરી નાખવાના બેતમાં છે. અમેરિકા એક તરફ ઈઝરાયલને ઢગલામોઢે શસ્ત્રો આપે છે અને બીજી બાજુ, દેખાડા પૂરતું, ઈઝરાયલને યુદ્ધ આટોપી લેવા કહે છે.

અમેરિકાનું આવું બેવડું વલણ હમણાં નરેન્દ્ર મોદીની મુલાકાત વખતે પણ ઉઘાડું પડ્યું. પોતાનાં શસ્ત્રોનાં કારખાનાં ચાલુ રાખવા અમેરિકા છાશવારે કોઈ ને કોઈ દેશનું નાક દબાવે છે. બે મહિના અગાઉ મોદી રશિયા જઈ પ્રમુખ પુતિનને મળી આવ્યા એનું અમેરિકાને પેટમાં દુખતું હતું. પોતાના એ દુખાવાનો ઈલાજ અમેરિકાએ ચાર અબજ ડૉલરનાં સશસ્ત્ર ડ્રોન વિમાનના કૉન્ટ્રાક્ટ રૂપે ભારત પાસે કરાવી લીધો. બાઈડને મોદીની મુલાકાત વખતે ઘણા અછોવાના કર્યા, જો કે મોદી અમેરિકા પહોંચ્યા એના બે જ દિવસ અગાઉ અમેરિકાએ એક ઊંબાડિયું પણ કરી લીધું. અમેરિકી પ્રશાસનની રહેમનજર નીચે ભારતિવરોધી કારનામાં કરતા ખાલિસ્તાની આગેવાન ગુરપતવંત સિંહ પન્નુની હત્યાના કહેવાતા પ્રયાસનો આરોપ મૂકી અમેરિકાએ આપણા રાષ્ટ્રીય સુરક્ષા સલાહકાર અજિત ડોવલ અને ગુપ્તચર એજન્સીના વડાને નોટિસ મોકલી.