આમ રચાયો પેરિસમાં ઈતિહાસ!

પૅરાલિમ્પિક્સ-૨૦૨૪ ૧૭મા સમર પૅરાલિમ્પિક્સમાં ભારતનું પ્રદર્શન શાનદાર રહ્યું. આ વખતે પૅરાલિમ્પિક્સમાં ૮૪ રમતવીર ગયેલા, જેમણે દેશ માટે સાત ગોલ્ડ સહિત કુલ ૨૯ મેડલ જીત્યા.

- કેતન મિસ્ત્રી (મુંબઈ)

ગયા રવિવારે (૮ સપ્ટેમ્બરે) ગણેશોત્સવના પ્રારંભ ટાણે દિવ્યાંગો માટેની ખેલકૂદ સ્પર્ધા, પેરિસ પૅરાલિમ્પિક્સ-૨૦૨૪ પૂર્ણાહુતિ પામી, જેમાં ભારતના પૅરા ઍથ્લીટ્સે સાત સુવર્ણ, નવ સિલ્વર અને ૧૩ બ્રોન્ઝ સમેત ૨૯ મેડલ જીતીને ઈતિહાસ રચ્યો છે. મેડલ ટૅલીમાં ભારત ૧૭૦ દેશોમાં ૧૮મા નંબર પર રહ્યો. તો ચીન સૌથી વધુ મેડલ જીતનારો દેશ બન્યો.

ચિત્રલેખા (૨ સપ્ટેમ્બર, ૨૦૨૪)ના અંકમાં એવો આશાવાદ વ્યક્ત કરવામાં આવેલો કે આ વખતે આપણા પૅરા ઍથ્લીટ્સ કમ સે કમ ૩૫ મેડલ તો લાવશે જ, પણ ચલો, ૨૯ પણ ઘણો સારો આંકડો છે. ભારતીય દિવ્યાંગ ખેલાડીઓના ઉત્કૃષ્ટ દેખાવથી આપણી છાતી ગજગજ ફૂલવી જોઈએ. એમનાં સમર્પણ, નિષ્ઠા, સાતત્યને બિરદાવવાં જ રહ્યાં. આ ખેલાડીઓએ ન માત્ર આપણને ગૌરવ અપાવ્યું, બલકે લાખ્ખો યુવાનયુવતીને પ્રેરણાનાં પીયૂષ પિવડાવ્યાં.

આ વખતના ભારતીય કાફલાએ અત્યાર સુધીનો શ્રેષ્ઠ દેખાવ કર્યો. દરેક ખેલાડી શારીરિકઆર્થિક-સામાજિક મર્યાદા અને પ્રતિકૂળ સંજોગ સામે બાથ ભીડીને આ સ્થાને પહોંચ્યો છે. સુમીત એન્ટિલની જ વાત કરીએ તો, એણે ૨૦૨૦ના ટોકિયો પૅરાલિમ્પિક્સના પોતાના પરફોર્મન્સનું પુનરાવર્તન કર્યું. મેન્સ જેવેલિનમાં એણે સુવર્ણ ચંદ્રક મેળવ્યો. તો પૅરાલિમ્પિક્સની આર્ચરીના ખેલમાં ગોલ્ડ મેળવનાર હરવીન્દરસિંહ પહેલો ભારતીય બન્યો.