ભારતીય હૉકીની આ પોલાદી ભીંત હવે ઈતિહાસ બની જશે! .

સ્કૂલના કોચની સલાહથી એણે બીજી રમતના બદલે હૉકી પર ધ્યાન કેન્દ્રિત કર્યું તો નૅશનલ ટીમમાં નબળા દેખાવ પછી કોચના સૂચનથી એ ગોલકીપર બન્યો... અને એ સાથે શ્રીજેશે ગોલપોસ્ટ સામે અડીખમ દીવાલ તરીકે સ્થાન જમાવી દીધું. પાછલાં વર્ષોમાં ભારત કૉમનવેલ્થ ગેમ્સ, એશિયાડ અને ઑલિમ્પિક્સમાં જીતી શક્યું છે એમાં એનો સિંહફાળો છે.

- ઉમંગ વોરા

વિનેશ ફોગાટે પેરિસ ઑલિમ્પિક્સ૨૦૨૪માં મહિલા કુસ્તીની રમતમાં જીતેલો ચંદ્રક ગુમાવવો પડ્યો એમાં આખા દેશમાં નિરાશા ફેલાઈ ગઈ હતી. વધુમાં ભારતીય મેન્સ હૉકી ટીમ સેમિ ફાઈનલ મૅચમાં જર્મની સામે હારી ગઈ એટલે બધાનાં દિલ તૂટી ગયાં. એક વધુ સુવર્ણચંદ્રક આપણને હાથતાળી આપી ગયો. જો કે ત્યાર પછી હૉકી ટીમે પરાક્રમ બતાવીને સતત બીજી ઑલિમ્પિક્સમાં કાંસ્યચંદ્રક જીતતાં આપણા જખમ પર થોડો તો મલમ લાગ્યો. એ કામ કરી આપ્યું ગોલકીપર પી.આર. શ્રીજેશ અને કૅપ્ટન હરમનપ્રીત સિંહે.

ઑલિમ્પિક ગેમ્સમાં પુરુષ હૉકી રમતમાં આજ સુધી ભારતે જેટલા મેડલ્સ જીત્યા છે એટલા બીજી કોઈ ટીમે જીત્યા નથી. આપણે અત્યાર સુધીમાં કુલ ૧૩ મેડલ જીતી ચૂક્યા છીએ.

અને એમાં છેલ્લા બે ઑલિમ્પિક્સ મેડલ જીતનારી ટીમમાં મહત્ત્વનું પ્રદાન રહ્યું ગોલકીપર પી.આર. શ્રીજેશનું. ૩૬ વર્ષની ઉંમરે પણ હરીફ ટીમના ખેલાડીઓના બુલેટની ઝડપે આવતા શૉટ્સ રોકવાની એની ચીલઝડપે જ શ્રીજેશને ભારતીય હૉકી ટીમમાં ધ વૉલનું સ્થાન મેળવી આપ્યું. ક્રિકેટમાં રાહુલ દ્રવિડ તો હૉકીમાં શ્રીજેશ!

શ્રીજેશે ટીમના વિજય બાદ આંતરરાષ્ટ્રીય કારકિર્દીમાંથી નિવૃત્તિ જાહેર કરી, એને કારણે ચાહકોને એના પ્રત્યે ગર્વની લાગણી ઔર વધી ગઈ. ખરેખર, ભારતની આ જીત હૉકી પ્રત્યે શ્રીજેશના જુસ્સા, મહેનત અને સમર્પણના પુરસ્કાર સમાન છે.