તમારું ઘર બીમારીનું ઘર ન બને એ માટે...

મેઘરાજાની સાથે સાજન-માજનની જેમ આવતાં મચ્છર-માખી ને બીજા જીવજંતુને દૂર રાખજો.

- વિશ્વા મોડાસિયા

દેશના મોટા ભાગના વિસ્તારોમાં ચોમાસું પૂરબહારમાં જામ્યું છે. વરસાદની ઋતુ આમ તો લોકોને ગમે છે, પણ આ સીઝન આપણા માટે અમુક વ્યાધિ પણ લઈ આવે છે, જેમ કે કેટલીક બીમારી. આ ઉપરાંત, આ દિવસોમાં ઔર એક મોટો માથાનો દુખાવો હોય તો એ છે મચ્છરનો ઉપદ્રવ. ખરેખર તો આ મચ્છર જ અમુક બીમારી ફેલાવતા વાઈરસ, વગેરેના વાહક (કૅરિયર) છે. વરસાદ દરમિયાન જ્યાં-ત્યાં પાણીનાં ખાબોચિયાં ભરાયેલાં રહેતાં હોવાને કારણે મચ્છરનો ઉપદ્રવ ખૂબ વધી જાય છે. મચ્છર કરડવાથી ડેન્ગ્યુ, મેલેરિયા, ચિકનગુનિયા જેવા રોગ થવાની શક્યતા પણ રહેલી છે.

મચ્છરની સાથે સાથે વિવિધ પ્રકારના કીટકો, જેવાં કે માખી, ફૂદાં, મકોડા, વગેરે જીવજંતુ પણ ખૂબ મોટા પ્રમાણમાં જોવા મળે છે. આવી સ્થિતિમાં અમુક પ્રકારની વનસ્પતિથી કે બીજા ઘરગથ્થુ ઉપાયથી એનો ઉપદ્રવ દૂર કરવા વિશે જાણીએ...