ભવ્ય સંયમ નગરીમાં દિવ્ય મહાશ્રમણ મહોત્સવ

તેરાપંથી આચાર્ય મહાશ્રમણજીના ચાતુર્માસ નિમિત્તે ડાયમંડ અને ટેક્સ્ટાઈલ નગરી સુરત અત્યારે ધર્મ નગરીમાં પરિવર્તિત થઈ છે.

- અરવિંદ ગોંડલિયા (સુરત)

૨૬૪ વર્ષ પૂર્વેની આ વાત છે. રાજસ્થાનના જોધપુરમાં એ સમયે ૧૩ જૈન સાધુ અને ૧૩ શ્રાવકો પ્રભુભક્તિમાં ડૂબેલા રહેતા. ભગવાન મહાવીરની વાણીનો મૃદુ પ્રચાર કરતા આ સાધુ-શ્રાવકોના ૧૩-૧૩ના સમૂહને જોઈને સેવક જાતિના એક કવિએ એને નામ આપી દીધું: તેરાપંથ પછી તો બધા એને તેરાપંથી તરીકે જ ઓળખવા લાગ્યા. વાત ભિક્ષુ સ્વામી સુધી પહોંચી. તો એમણે ઈશ્વરને ધ્યાનમાં રાખીને કહ્યુંઃ હે પ્રભો, યે તેરા પંથ હૈ... બસ, એ રીતે તેરાપંથનો જન્મ થયો. એના આદ્ય સ્થાપક ભિક્ષુ સ્વામી. તેરાપંથ જૈન ધર્મની એક વિશિષ્ટ શાખા છે, જેના વર્તમાન સુકાની છે, આચાર્યશ્રી મહાશ્રમણ.

હાલ જૈન સમુદાયમાં ચાતુર્માસ ચાલી રહ્યા છે. આરાધનાના આ દિવસોમાં સાધુ-સાધ્વીજી એક જગ્યાએ સ્થિરતા ધારણ કરીને લોકોને જિનવાણી સંભળાવે છે. સુરતમાં શ્વેતાંબર તેરાપંથ ધર્મ સંઘના ૧૧મા આચાર્ય શ્રી મહાશ્રમણજીના ચાતુર્માસ ચાલી રહ્યા છે. આખા સુરતમાં આ ભવ્ય ચાતુર્માસની ચર્ચા છે અને હજારો ધર્મપ્રેમીઓ દરરોજ પ્રવચનગંગામાં ડૂબકી લગાવી રહ્યા છે.

‘સંયમ વિહાર’માં જિનવાણીના શ્રવણ માટે વિશાળ મંડપ છે, તો બુદ્ધિ કૌશલ્ય અને સંસ્કાર વિકાસ માટે ગેમ ઝોન અને મ્યુઝિયમ પણ છે.