ચોમાસામાં તમારાં વાહનોની પણ બિયત સંભાળજો...

કાર હોય કે ટુ વ્હીલર, વરસાદનું પાણી એને કોઈ રીતે નુકસાન ન પહોંચાડે એનું ધ્યાન રાખવું જરૂરી છે.

- વિશ્વા મોડાસિયા

ચોમાસાની ઋતુ દરમિયાન આપણા સ્વાસ્થ્યની જેમ આપણાં વાહનોનું ધ્યાન રાખવું પણ એટલું જ જરૂરી છે. ભારતમાં ઘણા લોકો કામે જવા ટુ વ્હીલરનો ઉપયોગ કરતા હોય છે. ઓચિંતો વરસાદ પડે ત્યારે એમના માટે કફોડી સ્થિતિ સર્જાય છે. એમાં પણ જો વાહન અધવચ્ચે બગડે એટલે તો પત્યું. જો કે એવું ન થાય એ માટે વર્ષાઋતુ પહેલાં જ અગમચેતીનાં પગલાં ભરી લેવાં જોઈએ અને ચોમાસું ચાલુ હોય એ દરમિયાન પણ કેટલીક વાતોનું ધ્યાન રાખવું જરૂરી છે.

સૌથી મહત્ત્વનું છે, ચોમાસામાં વાહન સરખી રીતે પાર્ક કરવાનું. ખુલ્લામાં પાર્ક કરેલા વાહન પર લાંબો સમય પાણી પડે તો શક્ય છે કે એમાં કોઈ ને કોઈ ખરાબી આવે. આવું વેહિકલ ઠંડું પડી શકે છે અને એના પુરજામાં પાણી પ્રવેશી જવાથી એ ફરી શરૂ કરવામાં જહેમત ઉઠાવવી પડી શકે છે. એમાંય વાહનમાં રહેલાં ઈલેક્ટ્રિક ઉપકરણો ખોટકાવાની સંભાવના વધુ છે માટે લાંબો સમય કોઈ જગ્યાએ વાહન પાર્ક કરવાનું થાય તો એ પાર્કિંગ લૉટમાં કે શેડ હોય એવી વ્યવસ્થિત જગ્યાએ મૂકવું. આ જ નિયમ વાહન ઝાડ નીચે ઊભું રાખવામાં લાગુ પડી શકે. નબળું પડી ગયેલું ઝાડ ભારે પવનને લીધે તૂટી પડે ને એનો ભોગ તમારી કાર કે બાઈક ન બને એનું ધ્યાન તમારે જ રાખવાનું છે.