છોટી સી બાતથી છૂટાછેડા સુધી...

સંબંધમાં વિચ્છેદ ન પડે એવું ઈચ્છતાં હો તો આટલી તકેદારી લો.

- ડૉ. અપર્ણા દેશમુખ

કઈક બનાવવા કરતાં કંઈક તોડી નાખવું વધુ ઝડપી હોય છે. લગ્ન સિવાયની દરેક બાબતમાં આ સાચું છે...

જો હિલ તરીકે વધુ જાણીતા અમેરિકન લેખક જોસેફ હિલસ્ટ્રોમ કિંગનું આ વિધાન કેટલું સૂચક છે, નહીં?

છૂટાછેડા એ ખૂબ જ જટિલ અને જીવન બદલી નાખનારો અનુભવ છે. છૂટાછેડા લેનારાના માનસિક સ્વાસ્થ્યને અસર કરતાં ઘણાં ભાવનાત્મક, મનોવૈજ્ઞાનિક અને સામાજિક પરિબળ હોય છે. છૂટાછેડાની પ્રક્રિયાની અનિશ્ચિતતાને લીધે લોકો બેચેની અનુભવે છે. ભવિષ્યના સમયમાં જીવનમાં જે પરિવર્તન આવવાનાં છે એની ચિંતા એમને સતાવવા માંડે છે. ઘણા લોકો માટે આ ભાવનાત્મક વેદના અને ઉદાસીનું કારણ બને છે.

જો કે છૂટાછેડા કે ડિવોર્સનો નકારાત્મક પ્રભાવ ફક્ત માનસિક જ નહીં, શારીરિક સ્વાસ્થ્ય પર પણ પડે છે. એક સંશોધન મુજબ છૂટાછેડા લીધા હોય એ વ્યક્તિમાં તણાવ સંબંધિત બીમારીનું પ્રમાણ વધુ હોય છે, ખાસ તો હૃદયરોગ.

આરોગ્ય ઉપરાંત જીવનનાં અનેક પાસાં ડિવોર્સથી પ્રભાવિત થાય છે. કુટુંબો ભાંગી જવાથી, ખાસ તો બાળકો પર એનો ખરાબ પ્રભાવ પડે છે અને એની અસર હેઠળ બાળકોમાં ભાવનાત્મક સમસ્યા ઉત્પન્ન થાય છે કે પછી એનું પ્રમાણ વધે છે. માતા-પિતાની ફરજ બજાવવામાં મુશ્કેલી આવે છે. છૂટાછેડાની પ્રક્રિયાને લીધે આવતો નાણાકીય બોજ વ્યક્તિગત વેદનામાં હજી વધારો કરે છે.