ત્રણ સામે ત્રણ... જોખમ સામે આશા!

શૅરબજારમાં ડેરિવેટિવ્ઝ ટ્રેડિંગથી રિટેલ રોકાણકારોને દૂર રાખવા, તમામ પ્લેયર્સને સાઈબર જોખમોથી બચાવવા અને ડિજિટલ પ્લૅટફૉર્મના લેભાગુઓથી મધ્યસ્થીઓ સહિત નવા ઈન્વેસ્ટર્સને ચેતવવા ‘સેબી’એ હમણાં વધુ કદમ ભર્યાં છે એની ઝલક જોઈએ.

- 

શેરબજાર પ્રોત્સાહક બજેટની આશાના ઉત્સાહમાં નવી નવી ઊંચાઈ બનાવી રહ્યું છે, જેમાં ક્યાંક વચ્ચે કરેક્શન આવે અને બજાર ઘટે પણ છે, પરંતુ પાછું નવેસરથી વધવા લાગે છે. ઈન શૉર્ટ, ટ્રેન્ડ, મૂડ અને સેન્ટિમેન્ટ પણ બુલિશ છે. જો કે ક્યાં સુધી આ તાલ રહેશે એમ કોઈ પૂછે તો અત્યારે પાક્કો જવાબ તો નથી, પરંતુ પાક્કી આશા એ છે કે લાંબો સમય સુધી.

આપણે અહીં આટલી વાતમાં શૅરબજારના ટ્રેન્ડ યા તાલનો સંકેત સમજી શકીએ છીએ, હવે આપણે સતત સર્જાતા-બદલાતા સંજોગોમાં જોખમોની સંભાવના સામે શૅરબજારની નિયમનકાર સંસ્થા સેબી (સિક્યોરિટીઝ ઍન્ડ એક્સચેન્જ બોર્ડ ઑફ ઈન્ડિયા)ના બજારના માળખાકીય સુધારા અને રોકાણકારોનાં હિતોની રક્ષા માટેનાં પગલાંના સ્પષ્ટ સંકેતને સમજીએ.

રિટેલ રોકાણકારોને ડેરિવેટિવ્ઝથી દૂર રાખો