પડદા પાછળ રહીને રમતો કૅપ્ટન

ગયા વર્ષે ઘરઆંગણે, અમદાવાદમાં એક લાખ કરતાં વધુ દર્શકોની હાજરીમાં વન-ડે વર્લ્ડ કપની ફાઈનલમાં ધોવાઈ ગયેલી ટીમની આબરૂ પુનઃ સ્થાપિત કરવાનું કામ લગીરે સહેલું નહોતું. જો કે રાહુલ દ્રવિડ જેનું નામ. ભૂતકાળના સારા-નરસા અનુભવોનો ભાર રાખ્યા વગર, ગમે એવી પરિસ્થિતિમાં મગજ પરનો કાબૂ ગુમાવ્યા વગર અને વિશેષ તો જરાય ગાજવીજ કર્યા વગર કોચ તરીકે એણે ટીમને ફરી બેઠી કરી અને લાંબા સમયથી ભારત જેનાથી વંચિત હતું એ ટી-૨૦ વર્લ્ડ કપ જિતાડી આપ્યો. એણે મેદાનમાં રમવા ઊતરવાનું નહોતું, ચાલ ચાલવાની રણનીતિ અજમાવવાની હતી.

- હીરેન મહેતા

વર્ષ ૨૦૦૪...

પંદર વર્ષનાં વહાણાં પછી ભારતની ક્રિકેટ ટીમ પાકિસ્તાન રમવા ગઈ હતી. પાંચ વન-ડે અને ત્રણ ટેસ્ટનો પ્રવાસ હતો. પહેલી વન-ડે મૅચ હાર્યા પછી પણ ભારતે એ સિરીઝ જીતી લીધી હતી. સ્વાભાવિક છે કે ભારતીય ખેલાડીઓ સાતમા આસમાનમાં વિહરતા હતા. ટીમનો કૅપ્ટન હતો સૌરવ ગાંગુલી. એનું હુલામણું નામઃ દાદા. ગાંગુલી આમ પણ એના આક્રમક સ્વભાવ અને તડ-ફડ જબાન માટે જાણીતો હતોઃ ખરા અર્થમાં દાદા!

ચિત્રલેખા વતી ભારતીય ટીમના એ પાકિસ્તાનપ્રવાસમાં જવાનો મોકો મને મળ્યો હતો. વન-ડે શ્રેણી જીત્યા પછી ભારતીય ટીમના મૅનેજર ડૉ. રત્નાકર શેટ્ટી થોડા પત્રકારો સાથે બેઠા હતા. વાતવાતમાં એમણે એક મજેદાર કિસ્સો કહ્યો...

ભારતીય ટીમ પાકિસ્તાન રવાના થઈ એ પહેલાં બધા ખેલાડીઓએ તત્કાલીન વડા પ્રધાન અટલ બિહારી વાજપેયીના નિવાસસ્થાને જવાનું હતું. વાજપેયીજી થોડા ઋજુ હૃદયના. એમણે ટીમના કૅપ્ટન તરીકે ગાંગુલીને કહ્યું: ‘મૅચ જીતો ન જીતો, પાકિસ્તાનીઓનાં દિલ જીતીને આવજો.'

દાદાથી બોલ્યા વગર ન રહેવાયું: ‘દિલ જીતશું... પણ મૅચ તો જીતશું જ!' ગાંગુલીએ જે રીતે જવાબ વાળ્યો હતો એનાથી બધા સ્તબ્ધ થઈ ગયા. એક સાથી ખેલાડીએ તરત વાત વાળી લીધીઃ ‘સર, અમે ખેલાડીના જુસ્સા સાથે જ રમીશું અને અમારી રમતથી પાકિસ્તાની પ્રજાનાં દિલ જીતીને આવીશું. આખરે તો બે દેશના સંબંધ સાચવવાની અમારી પણ જવાબદારી છે!’

વાજપેયીજી આ ઠાવકો જવાબ સાંભળી ખુશ થઈ ગયા. સૌરવ ગાંગુલીનો એ સાથી ખેલાડી હતોઃ રાહુલ દ્રવિડ. બન્ને સમાન ઉંમરના, આંતરરાષ્ટ્રીય ક્રિકેટમાં બન્નેનો પ્રવેશ એકસાથે, એક જ મૅચમાં. જો કે બન્નેના વાણી-વ્યવહારમાં જમીન-આસમાનનો ફરક. ગાંગુલી એકદમ આક્રમક, તડ ને ફડ કરનારો, દ્રવિડ શાંત, મરતાંને મર ન કહે એવો. આપણી ભાષામાં એને ટાઢું માટલું કહી શકીએ એવો.

ફાઈનલના ત્રણ એક્કા વિરાટ કોહલી, હાર્દિક પંડ્યા અને જસપ્રીત