કુછ તો હુઆ હૈ... કુછ હો રહા હૈ...

સંસ્કૃતિઓના સંગમ માટે જાણીતા બનારસમાં ચૂંટણીનું કુરુક્ષેત્ર મંડાયું છે. અઢારમી લોકસભાની ચૂંટણીનું સાતમા ચરણનું મતદાન અહીં પહેલી જૂને થઈ રહ્યું છે. વડા પ્રધાન નરેન્દ્ર મોદી વારાણસીની બેઠક પરથી વાર એ કે આ વખતે કેટલા વિક્રમ તૂટશે? અહીંનાં વિકાસકાર્યોં વિશે નગરવાસીઓ શું માને છે?

- કેતન મિસ્ત્રી (મુંબઈ)

એક તો હવામાન હૉટંહૉટ ને એમાં ભારતની સૌથી હૉટ સીટ વારાણસી. લોકસભાની હાલ ચાલી રહેલી ચૂંટણીમાં વડા પ્રધાન નરેન્દ્ર મોદીએ ત્રીજી વાર વારાણસીથી ઝંપલાવ્યું છે અને જીતની હૅટ્રિક નોંધાવવા પીએમ સહિત સૌકોઈ આતુર છે. આ લખાય છે ત્યારે (સોમવાર, ૨૭ મે) વારાણસીમાં તાપમાનની સાથે સાથે પ્રચારનો પારો પણ ઊંચે જઈ રહ્યો છે. ભાજપના દિગ્ગજ નેતાઓ ગંગાઘાટ પર ઊતરી પડ્યા છેઃ યુપીના મુખ્ય પ્રધાન યોગી આદિત્યનાથ, ડેપ્યુટી સીએમ બ્રિજેશ પાઠક, રાષ્ટ્રીય અધ્યક્ષ જે.પી. નડ્ડા, કેન્દ્રીય પ્રધાન પીયૂષ ગોયલ, મધ્ય પ્રદેશના સીએમ મોહન યાદવ, મનોજ તિવારી, વગેરે. સૌએ વડા પ્રધાનને વિક્રમસર્જક વોટ્સથી જિતાડવા કમર કસી છે. અહીંના વિવિધ ઘાટ પર બનારસના વર્લ્ડ ફેમસ, સફેદ માખણથી લથબથ મલાઈ–ટોસ્ટ અને કુલ્હડની ચા પીતાં પીતાં રાજકીય ચર્ચા ચાલી રહી છે.

વારણા અને અસી એમ બે નદીના સંગમ પર વસેલી વારાણસી અથવા બનારસ અથવા કાશીને ઈતિહાસકારો લઘુ ભારત તરીકે ઓળખે છે. તો કવિ અષ્ટભુજા શુક્લ કહે છે કે ગુરુનું સંબોધન કરીને કોઈ ઘાટ પર લઈ જઈને કે પટકનારા બનારસમાં બધા જ બધાના ગુરુ છે. રિક્ષાવાળા ગુરુ છે, પાનવાળા ગુરુ છે, પંડા ગુરુ છે, નાઈ-કસાઈ-ભાઈ ગુરુ છે, શિષ્ય ગુરુ છે અને... ગુરુ છે જ, પરંતુ ગુરુ વિશે સોના અનુભવ અલગ અલગ છે.

આવી ગુરુઓની નગરી પર છેલ્લા થોડા દિવસથી દેશ જ નહીં, પણ દુનિયાભરના રાજકીય ખેરખાંઓની નજર છે. વડા પ્રધાન તથા અન્ય નેતાઓની અહીં વિક્રમસર્જક, જંગી સભા, સરઘસ યોજાઈ ગયાં તો ગયા અઠવાડિયે પ્રિયંકા ગાંધી અને સમાજવાદી પક્ષનાં ડિમ્પલ યાદવનું વિરાટ સરઘસ નીકળ્યું. વડા પ્રધાન સામે કોંગ્રેસ-સમાજવાદી પક્ષના સંયુક્ત ઉમેદવાર અજય રાય ઊતર્યા છે. અજય દાવા તો બડા બડા કરી રહ્યા છે. જો કે અહીંથી ચૂંટણી લડતા બસપાના સૈય્યદ નિયાઝ અલી પણ દાવો કરે છે કે એમની લડાઈ સીધી પીએમ સાથે છે. એમાંય જીત તો મારી (સૈય્યદ નિયાઝ અલીની) જ થશે અને અજય રાય તો ત્રીજા નંબરે આવશે.