૪ જૂન પછી શૅરબજારમાં શું થશે?

મોદી સરકાર ઈસ બાર કિતને પાર...નું પરિણામ આવવાને થોડા દિવસની જ વાર છે. આવા નાજુક સમયમાં આર્થિક જગતની નજર શૅરબજાર, વિદેશી રોકાણના પ્રવાહ તેમ જ વેપાર-ઉદ્યોગ વિશે ટોચના નેતાઓનાં નિવેદન પર હોય એ સ્વાભાવિક છે.

- જયેશ ચિતલિયા

શૅરબજારમાં ઈક્વિટી કલ્ટનો ટ્રેન્ડ વધતો રહેવો જોઈએ, બચતોનો પ્રવાહ બિનઉત્પાદક કે ફિઝિકલ એસેટ્સને બદલે વૃદ્ધિલક્ષી એસેટ્સ તરફ ફંટાવો જોઈએ, જેની મારફત મૂડીસર્જન થવું જોઈએ. આ મૂડી કૉર્પોરેટ્સને એમના વેપાર-ઉદ્યોગના વિકાસ માટે કામ લાગે અને અંતે અર્થતંત્રની વૃદ્ધિમાં સહભાગી બને એવો માહોલ રચાવો જોઈએ, એને બદલે શૅરબજારમાં મહત્તમ સટ્ટાકીય પ્રવૃત્તિ જેવા ફ્યુચર્સ-ઑપ્શન્સ ટ્રેડિંગનું ચલણ વધુ ચાલ્યા કરે તો એ તંદુરસ્ત નિશાની ન ગણાય...

આ અભિપ્રાય નાણાપ્રધાન નિર્મલા સીતારમણે હમણાં એક જાહેર કાર્યક્રમમાં શૅરબજારના આગેવાનો સમક્ષ વ્યક્ત કર્યો હતો. આપણે એમના શબ્દોનું અર્થઘટન કરીએ તો અર્થ કંઈક આવો જ નીકળેઃ શૅરબજારમાં ફ્યુચર્સ અને ઑપ્શન્સ ટ્રેડિંગમાં રિટેલ રોકાણનો પ્રવાહ સતત ચકાસતાં રહેવું જોઈએ. રિટેલ વર્ગનું એફ ઍન્ડ ઓમાં વધુપડતું એક્સપોઝર બજાર માટે પડકાર અને જોખમ ઊભાં કરી શકે છે. આ વિશે એમણે એનએસઈ અને બીએસઈ બન્નેને સજાગ રહેવાની સલાહ આપી છે.