રજામાં બાળકોને આપો ક્વોલિટી ટાઈમના વિકલ્પ

ના, એમને આડાંઅવળાં કામમાં ગોંધી રાખવાનાં નથી, પરંતુ ઘરમાં જ જ્ઞાન સાથે ગમ્મત મળે એવું કરવાનું છે.

- વિશ્વા મોડાસિયા

ઉનાળુ વેંકૈશનની શરૂઆત થઈ ગઈ છે. સ્વાભાવિક છે કે બાળકોની રજાનો લાભ લઈ ઘણા પરિવાર આ દિવસોમાં બહારગામ ફરવા જતા હોય છે. જો કે આ સામે એવાંય અનેક કુટુંબ છે, જેમાં પતિ-પત્ની બન્ને કામ કરતાં હોય અને એમને આ દિવસોમાં સાથે રજા ન મળે. આવાં વર્કિંગ પેરન્ટ્સને વૅકેશનના ગાળામાં ટેન્શન રહે કે રજાના આખા આખા દિવસો બાળકો કેવી રીતે પોતાનો સમય પસાર કરશે.

વૅકેશન દરમિયાન એવી અનેક ઍક્ટિવિટી છે, જેના થકી બાળક જ્ઞાનની સાથે ગમ્મત મેળવી શકે છે. વધતી જતી ગરમીને કારણે બાળકોને બપોરના સમયે બહાર રમવા જવા માટે માતા-પિતા પરમિશન આપતાં નથી. એ સમયે બાળકોને ઘરમાં જ નાની નાની ઍક્ટિવિટીથી મનોરંજન પણ મળી રહે, જેમ કે બાળકો ઘરમાં ચેસ, લુડો, કૅરમ, વગેરે રમી શકે છે. આ બધી ઈનડોર ગેમ રમવાથી બાળકની બદ્ધિનો વિકાસ સારી રીતના થાય છે અને એમનામાં ધીરજ. એકાગ્રતા, આયોજનની તાલીમ જેવા ગુણ કેળવી શકાય છે. ઘરે આવતાં અખબારો કે મૅગેઝિનમાં ક્રૉસવર્ડ પઝલ ઉકેલીને બાળકો એમનું શબ્દભંડોળ પણ વધારી શકે. આવી બીજી ગેમ્સ છેઃ માઈન્ડ મૅટ્રિક્સ, બિલ્ડિંગ બ્લૉક્સ, વર્ડ બિલ્ડિંગ, વગેરે. પાનાંની અમુક ગેમ્સથી પણ બાળકો સારી નિરીક્ષણશક્તિ કેળવી શકે.