જીએસટીનું કલેક્શન વધે છે... વેપાર-ઉદ્યોગમાં ફ્રસ્ટ્રેશન વધે છે!

નવા નાણાકીય વરસના પહેલા મહિનામાં જીએસટીનું કલેક્શન બે લાખ કરોડ રૂપિયાની ઉપર પહોંચી જવાનાં ગુણગાન ભલે ગવાયાં, પરંતુ આ ટૅક્સ પાછળની દાસ્તાન કંઈક અંશે કરુણ બનતી જાય છે. કહેવાય છે કે અત્યારની મોંઘવારીમાં જીએસટીના બોજનો ફાળો પણ છે. મોટા ભાગની પ્રજા આ વેરાના બોજ હેઠળ દબાઈ રહી છે. સરકારે આ વિષયમાં વ્યવહારદક્ષતા દાખવવાની જરૂર છે.

- જયેશ ચિતલિયા

કેન્દ્ર સરકાર માટે જીએસટી એ કરવેરાની આવકનું મોટું માધ્યમ બનતું જાય છે ત્યારે બીજી બાજુ એના વિવિધ પ્રકારના બોજ કે ભારને હળવો કરવા એના માળખામાં વધુ સુધારાની જરૂરત સતત વ્યક્ત થઈ રહી છે. જીએસટી નિમિત્તે વેપારીઓને ઈશ્યૂ થઈ રહેલી સંખ્યાબંધ નોટિસ અને એમની ધરપકડના કિસ્સા ચિંતાજનક બનીને સુપ્રીમ કોર્ટ સુધી પહોંચ્યા છે. અદાલતે કેન્દ્ર સરકારને આ વિષયમાં સ્પષ્ટતા કરવા તેમ જ નાગરિકોની હેરાનગતિ ન થાય એની કાળજી લેવા કહ્યું છે. અદાલતે કેન્દ્ર પાસે અમુક કેસની વિગત માગવા ઉપરાંત કાયદાના અર્થઘટન અર્થે યોગ્ય માર્ગરેખા જાહેર કરવા પણ કહ્યું છે.

અહીં એ નોંધવું જરૂરી છે કે જીએસટી, કસ્ટમ્સ અને પ્રિવેન્શન ઑફ મની લોન્ડરિંગ ઍક્ટની ચોક્કસ જોગવાઈ ઓને પડકારતી અરજીઓને પગલે સુપ્રીમ કોર્ટે આ આદેશ બહાર પાડ્યો છે.

બિઝનેસ કરવાનું બન્યું મુશ્કેલ