લો, ટૅક્સ હેવન ગણાતા દુબઈમાં હવે આવે છે કૉર્પોરેટ ટૅક્સ

દુનિયાની ટોચની ઘણીખરી કંપની જ્યાં કોઈ ને કોઈ રીતે હાજરી ધરાવે છે એ દુબઈમાં અત્યાર સુધી આ કંપનીઓ પાસેથી કોઈ કર વસૂલવામાં આવતો નથી એ જાણીને નવાઈ લાગે. આ જ કારણે દુબઈ એ વ્યાપાર-ઉદ્યોગ માટે સ્વર્ગ ગણાય છે. જો કે હવે પશ્ચિમ એશિયાનું આ સૌથી મોટું બિઝનેસ હબ આર્થિક ગેરરીતિ ડામવાના નામે કરવેરા વસૂલશે.

- દિનેશ ગાઠાણી (દુબઈ)

હજી પંદરેક દિવસ પહેલાં દુબઈ અસાધારણ હું વરસાદને કારણે ચર્ચાને ચાકડે ચડ્યું હતું. વરસ-દોઢ વરસનો વરસાદ એક જ દિવસમાં ખાબક્યો એમાં તો જાણે અડધું દુબઈ ડૂબમાં ગયું હોય એવાં દશ્યો મોબાઈલ ફોનમાં ફરવા માંડ્યાં. હમણાં બે દિવસ અગાઉ પાછું દુબઈ અખબારોમાં ચમક્યું. આ વખતે કારણ છેઃ અહીં આકાર લેનારું દુનિયાનું સૌથી મોટું ઍરપોર્ટ.

દુબઈમાં આમ તો બધું મોટું મોટું જ છે. વિશ્વનું સૌથી મોટું બિલ્ડિંગ, સૌથી મોટો મૉલ, સૌથી મોટો મનોરંજન પાર્ક, સૌથી મોટો માનવસર્જિત ટાપુ, વગેરે. વિચાર કરો, ૧૯૭૦ના દાયકા સુધી બહુ ઓછા લોકો દુબઈમાં રહેવાનું પસંદ કરતા. એ પછીનાં ૨૦ વર્ષમાં જ દુબઈએ એવો તો ચમત્કાર કર્યો કે દુનિયાભરના લોકો માટે દુબઈ એ ડ્રીમ સિટી બની ગયું. આંખ આંજી દે એવો એનો વિકાસ હતો અને એટલે જ દુબઈને ગલ્ફ ટાઈગર એવી ઓળખ મળી ગઈ. આપણે જેને અખાતના દેશો (ગલ્ફ કન્ટ્રીઝ) કહીએ છીએ એમાં સૌથી વધુ વટ દુબઈનો જ. એટલે સુધી કે સંયુક્ત આરબ અમીરાત (યુએઈ) એ દુબઈ સહિત સાત અમીરાત અર્થાત્ સાત રાજ્યોનો સમૂહ છે, પણ મોટા ભાગના લોકો માટે યુએઈ એટલે દુબઈ જ.

એક જમાનામાં વિશ્વનું ઑઈલ કૅપિટલ ગણાતા દુબઈમાં હવે ક્રૂડ ઑઈલ તો ઝાઝું નીકળતું નથી, પરંતુ દુબઈ હવે તો દુનિયાનું મોટું બિઝનેસ હબ બની રહ્યું છે. દુબઈ એ રીતે તો હવે લંડન, પેરિસ, ન્યુ યોર્ક તથા સિંગાપોરની હરોળમાં આવી ગયું છે. અહીં એ નોંધનીય છે કે વિશ્વની ટોચની ૫૦૦ કંપનીમાંથી અડધોઅડધ કંપનીની ઑફિસ કે બ્રાન્ચ દુબઈમાં છે.