નિવૃત્તિ હોય તો આવી!

ભાવનગરના મધુભાઈ શાહ ૨૦૦૪માં બૅન્કની નોકરીમાંથી નિવૃત્ત થયા, પણ એ પછીય બે દાયકાથી એ રોજ બૅન્કમાં જાય છે ને અગાઉની જેમ જ એમનું કામ કરે છે. માત્ર સેવાભાવથી.

- જયેશ દવે (ભાવનગર)

૩૬ વર્ષની નોકરી દરમિયાન એકેય રજા નહીં અને નિશ્ચિત વયમર્યાદાથી ૨૦૦૪માં નિવૃત્ત થયા બાદ પણ છેલ્લાં ૨૦ વર્ષથી નિયમિતપણે એ જ સ્થળે અવેતન-માનદ સેવા આપવાનું કામ કોઈ કરે એ વાત ગળે ઊતરે ખરી?

હા, આવી એક કર્મઠ વ્યક્તિ આપણી વચ્ચે છે અને એ છે ભાવનગરના મધુભાઈ શાહ.

આ નિવૃત્ત બૅન્ક કર્મચારીની વાતો અચરજભરી લાગે, પરંતુ એ જ એમની નિષ્ઠાની પૂંજી છે. ૩૬ વર્ષની બૅન્કની નોકરી દરમિયાન એમણે એક પણ રજા ભોગવી નથી. ન તો મેડિકલ બિલ લીધું છે કે ન કોઈ પ્રકારની લોન લીધી છે. નોકરી દરમિયાન નિશ્ચિત સમયે ફરજ પર હાજર અને સમય પૂર્ણ થયા બાદ જ બૅન્ક સંકુલ છોડવાનો ક્રમ જાળવ્યો અને ઓવરટાઈમ કરવા છતાં પણ એનું વળતર સુદ્ધાં ક્યારેય લીધું નથી. આ રીતે ૨૦૦૪માં નિવૃત્ત થયા બાદ છેલ્લાં ૨૦ વર્ષથી મધુભાઈ હજી પણ બૅન્કમાં સ્વેચ્છાએ જાય છે અને બૅન્ક એમને આવકારે છે. સ્ટેટ બૅન્કના એનઆરઆઈ ખાતેદારો સાથે એમણે કેળવેલા સંબંધ અને એમની આ સેવા પરની હથોટીનો લાભ એ આપે છે માત્ર સેવાભાવથી, અવેતન અને પોતાની સાઈકલ પર જઈને.

મધુભાઈ શાહ આ ઉંમરે પણ અખાડાના સમર કૅમ્પના આયોજનમાં સક્રિય ભાગ લે છે.