અપેક્ષા ને ઉપેક્ષા વચ્ચેની કેડી

કાશ, હું એ વાત સમજાવી શકું, કેટલું ચાહું છું ને ચાહી શકું. અંજના ગોસ્વામી ‘અંજુમ’

- હિતેન આનંદપરા

અભિવ્યક્તિ કરવી એક કળા છે અને અભિવ્યક્તિ સમજવી એ બીજી કળા છે. કેટલીય વાર વાત કરવા આપણને યોગ્ય શબ્દ નથી મળતા. શબ્દ મળે તો વિચારોને ક્રમવાર મૂકવામાં ગોથું ખાઈ જવાય એટલે વાતની ધારી અસર ન ઊપજે. બીજી તરફ, સંતો કે ધર્મગુરુઓની કથા સાંભળીએ તો એમાં જીવનના નિચોડ રૂપી અનેક સુંદર વાત કહેવાતી હોય. કમભાગ્યે આપણું અડધું ધ્યાન મોબાઈલમાં હોય. ક્રિયામાં નાછૂટકે ભાગ લેવાની માનસિકતા સાથે બેઠેલું મન કશુંક આત્મસાત્ કરવાની તક ગુમાવી બેસે છે.