ડી. ગુકેશઃ વિશ્વ શતરંજનો નવો સિતારો

ચેસની રમતના વર્લ્ડ ચૅમ્પિયનને પડકાર આપે એવા ખેલાડીને શોધવા માટે થતી સ્પર્ધાના ભારતીય વિજેતાને ઓળખી લો.

-  કિશોર પટેલ

ઉંમરઃ સત્તર વર્ષ અને અગિયાર મહિના. સિદ્ધિઃ આ ઉંમરે કૅન્ડિડેટ સ્પર્ધા જીતનારો પ્રથમ ખેલાડી તથા કૅન્ડિડેટ સ્પર્ધા જીતનારો વિશ્વનાથન્ આનંદ પછીનો બીજો ભારતીય ખેલાડી. નામઃ ડી. ગુકેશ.

ચેસની દુનિયામાં જે વર્લ્ડ ચૅમ્પિયન બને એ ત્રણ વર્ષ સુધી વિશ્વવિજેતા નો ખિતાબ જાળવી રાખે છે. ત્રણ વર્ષ પછી એ વર્લ્ડ ચૅમ્પિયનને પડકાર આપે એવા ખેલાડીને શોધવા માટે થતી સ્પર્ધાને બૅન્ડિડેટ સ્પર્ધા કહેવાય છે.

જુદા જુદા માપદંડથી ચૂંટાયેલા આઠ ખેલાડી વચ્ચે આ સ્પર્ધા રમાય છે. આ વર્ષે કૅન્ડિડેટ સ્પર્ધામાં આઠમાંથી ડી. ગુકેશ ઉપરાંત આર. પ્રજ્ઞાનંદ અને વિદિત ગુજરાતી એમ ત્રણ ખેલાડી ભારતના હતા. મહિલાઓની કૅન્ડિડેટ સ્પર્ધામાં કોનેરુ હમ્પી અને આર. વૈશાલી જેવી ખેલાડી પણ હતી. વૈશાલી એટલે આર. પ્રજ્ઞાનંદની મોટી બહેન. આમ ભાઈ-બહેનની જોડી કૅન્ડિડેટ સ્પર્ધામાં રમી હોય એવી વિશ્વ ચેસ માટે આ પહેલી જ ઘટના.

તામિલનાડુના ચેન્નઈમાં તેલુગુભાષી પરિવારમાં ગુકેશનો જન્મ ૨૯ મે, ૨૦૦૬ના રોજ થયો. ગુકેશનાં માતા-પિતા આંધ્ર પ્રદેશનાં છે. પિતા રજનીકાંત ઈએનટી સર્જ્યન, જ્યારે માતા પદ્માકુમારી માઈક્રો બાયોલૉજિસ્ટ છે. સાત વર્ષની ઉંમરે ગુકેશ ચેસ રમતાં શીખ્યો.