પેટીએમ કરો... કે ન કરો?

‘પેટીએમ’ની બૅન્ક પર રિઝર્વ બૅન્કે લાદેલાં આકરાં નિયંત્રણ બાદ સ્થાપક ચૅરમૅન-મૅનેજિંગ ડિરેક્ટર-સીઈઓ વિજય શેખર શર્મા આ કટોકટી નિવારવા અથાગ પ્રયાસ કરી રહ્યા છે. સવાલ એ છે એવું તે શું બન્યું કે એમની સામે આવાં કડક પગલાં લેવાં પડ્યાં? ગ્રાહકોને શું અને કેવીક અસર પડશે? અન્ય વિકલ્પ શું છે?

- કેતન મિસ્ત્રી (મુંબઈ)

શાનદાર વેબ-સિરીઝ પંચાયત સીઝન ટુનો ખુમાર મનોરંજનપ્રેમીઓ પર એવો ચડેલો કે એના જાતજાતનાં મશ્કરા મીમ્સ બન્યાં, આજેય બની રહ્યા છે, જેમ કે દેખ રહા હૈ ના, બિનોદ... એ સંવાદ. આ જ સંવાદ વાપરીને કહેવું હોય તો કહી શકાય કે દેખ રહે હો ના, ભારત...રિઝર્વ બૅન્ક કિતની સિરિયસ છે.

સામાન્ય શિરસ્તો એવો છે કે રિઝર્વ બૅન્ક ઑફ ઈન્ડિયા (આરબીઆઈ)એ કોઈ વ્યક્તિ કે કંપની દ્વારા આચરાયેલાં આર્થિક કૌભાંડ સામે કડક પગલાં લેવાનાં હોય તો એ શુક્ર-શનિ દરમિયાન લે, જેથી શૅરબજારોને ઝટકો થોડો ધીરો લાગે, પણ ફિનટેક કંપની (ફાઈનાન્સિયલ ટેક્નોલૉજી ક્ષેત્રની કંપની)ના મહાનાયક સમા વિજય શેખર શર્માએ સ્થાપેલી પેટીએમ પેમેન્ટ્સ બૅના કિસ્સામાં આરબીઆઈએ આવી કોઈ પરવા કર્યા વિના ધોંસ જમાવી બુધવાર, ૩૧ જાન્યુઆરીએ. બીજા દિવસે, એક ફેબ્રુઆરીએ નાણાપ્રધાન નિર્મળા સીતારમણ દેશ સામે બજેટ એટલે કે સરકારનો હિસાબકિતાબ રજૂ કરી રહ્યાં હતાં તે વખતે આરબીઆઈએ લીધેલાં પગલાંને કારણે પેટીએમના શૅર ભફાંગ... ભફાંગ કરતાં પટકાઈ રહ્યા હતા. આ લખાય છે ત્યારે (મંગળવાર, છ ફેબ્રુઆરીએ) શૅર ૪૫ ટકા જેટલા તૂટ્યા.

આશરે દસ હજાર કરોડ રૂપિયાના આસામી ગણાતા અને દિલ્હીના ગૉલ્ફ લિન્ક લ્યુટિયન્સ બંગલો ઝોનમાં આશરે એંસી કરોડ રૂપિયાનું નિવાસ ધરાવતા વિજય શેખર શર્મા કોણ છે ને એ શું કામ છાપે ચડ્યા છે?

ઉત્તર પ્રદેશના અલીગઢ જિલ્લામાં વસતા શિક્ષકના પુત્ર છે વિજય શેખર શર્મા. સફળતાનું શિખર સર કરવાની જીદ હોય ને એ દિશામાં મક્કમ ઈરાદા સાથે આગળ વધો તો સક્સેસ મળે જ એનું જ્વલંત ઉદાહરણ છે ૪૫ વર્ષના વિજય શેખર. હિંદી મિડિયમમાં ભણેલા વિજય શેખરને ડગલે ને પગલે નબળી અંગ્રેજી નડતી, પણ એ ક્યારેય હિંમત હાર્યા નહીં. એમણે પ્રખ્યાત દિલ્હી ટેક્નોલૉજી યુનિવર્સિટીમાં ઍડ્મિશન મેળવ્યું. ભણતાં ભણતાં જ એમણે આપ્રેન્યૉર બનવાનાં સપનાં જોવા માંડેલાં. અમેરિકાની સ્ટેનફર્ડ યુનિવર્સિટીમાં ઉચ્ચ અભ્યાસ માટે જવું હતું, પણ પૈસાની ખેંચના લીધે એ સપનું સપનું જ રહી ગયું. જો યુનિવર્સિટીમાં ભણતાં ભણતાં એમણે એકવેબસાઈટ બનાવેલી, જે કોઈ અમેરિકન કંપનીને ૧૦ લાખ ડૉલરમાં વેચી દીધેલી.