ફોતરા

એ લોકોનું માનીએ તો રાઠોડસાહેબ એટલે મીઠું ઝેર. ક્યારેય ગુસ્સે ન થાય, ક્યારેય સામે ન બોલે, ક્યારેય કોઈ કામની ના ન પાડે તોય કામ એમનાં જ કરે, જેમાંથી એમને કંઈ મળતું હોય. કોઈ એમના મોઢે કશું ન કહે. આ તો પાછળ થતી વાત... સાંભળનારને ગમે એવી વાત.

- માવજી મહેશ્વરી

એક મહિનો થઈ ગયો છે. વાત આમ તો જૂની થઈ ગઈ છે તોય હજી મામલતદાર ઑફિસનું વાતાવરણ ગરમ છે. ઑફિસ જ નહીં, હવે તો નાનકડા તાલુકામથકમાં પણ ચર્ચા છે. ગામના કેટલાક ખટસવાદિયા લોકો કારણ વગર મામલતદાર ઑફિસે આંટા મારે છે. શું થયું હતું? કેમ રાઠોડસાહેબ ઑફિસમાં આવતા નથી? એમની બદલી થઈ ગઈ છે? પેલા છોકરા જોડે શું માથાકૂટ હતી? જેવા પ્રશ્નોનો તાગ મેળવવા બધા મથે છે, પણ ઑફિસના સ્ટાફમાંથી કોઈ મગનું નામ મરી પાડતું નથી.

જો કે કોઈને સત્તાવાર રીતે તો ખબર પણ નથી કે રાઠોડસાહેબની બદલી થઈ ગઈ છે. કદાચ ખબર છે એ બોલતા નથી, વાતાવરણ ગોરંભાયેલા આભ જેવું છે. હા, એ વાત ખરી કે રાઠોડસાહેબ એક મહિનો થયો ઑફિસે આવતા નથી. હવે રાઠોડસાહેબને પુછાય કઈ રીતે કે આપ કેમ નોકરીએ નથી આવતા? પેલા અજયને પણ કોઈ થોડું પૂછે કે કેમ તને કોઈ બીક નથી લાગતી? તું કેમ રજા પર ઊતરી ગયો નથી?

આમ તો વાત કંઈ નહોતી. રાઠોડસાહેબ અને અજયને માથાકૂટ થઈ હતી. જો કે નાનાએવા શહેરમાં ચર્ચા જામી છે, મજાની જામી છે. રાઠોડસાહેબના વિરોધીઓને તો મસાલો મળ્યો છે. વાત નિંદારસની ખરલમાં ઘૂંટાઈ ઘૂંટાઈને મસાલેદાર બની રહી છે.

રાઠોડસાહેબ જ્યાં નોકરી કરતા એ વિસ્તાર જિલ્લાને સાવ છેવાડે આવેલો. શહેરની વસતિ સાવ પાંખી. મોટા ભાગના ગામડાંના લોકો મુંબઈ અને બીજે વર્ષો પહેલાં ચાલ્યા ગયા હતા. અહીં કોઈની બદલી પણ સજા ગણાતી. એક તો છેવાડે આવેલું શહેર અને કોઈ ખાસ આવક વગરનું. શહેર તો કહેવાનું. બાકી, સારી ચંપલેય ન મળે. મામલતદારની કચેરીનો સ્ટાફ પણ આંગળીના વેઢા વધી પડે એટલો જ. એ દિવસના બનાવ પછી ઑફિસમાં ગુસપુસ થયા કરતી, પણ કોઈ ખૂલીને બોલતું નહોતું કે ન તો કોઈ રાઠોડસાહેબની પડખે ઊભું રહ્યું હતું. અજય તો આમેય નવો વળી ગાંધીનગરનો. જોરજોરથી બેય એકબીજા સામે બોલ્યા હતા એની બધાને ખબર, પણ વાંક કોનો હતો એ જ કોઈ સમજ્યું નહોતું, છતાં અંદરખાને તો બધાને આ વાતમાં રસ પડ્યો હતો.