આવી અંધશ્રદ્ધાનો ઈલાજ ક્યાં શોધવો?

બાળકોનું ભલું કરવું હોય તો એમનાં માતા-પિતાને કેટલીક પ્રથા અને ગેરમાન્યતા સામે જાગ્રત કરવાં પડશે.

- ડૉ. મિતાલી સમોવા

કહેવાય છે કે માતા-પિતાથી વધુ પ્રેમ, કાળજી અને સુરક્ષા એક બાળકને બીજું કોઈ ન આપી શકે, છતાં આપણે રોજેરોજ એવા પણ કિસ્સા જોઈએ-સાંભળીએ છીએ, જેમાં રક્ષક માતા-પિતા જ જાણે-અજાણે બાળકનો જાન લેવામાં નિમિત્ત બની જાય છે. કવિ કલાપી તો કહી જ ગયા છે કે જે પોષતું તે મારતું, તે ક્રમ દિસે કુદરતી! સર્પમાતા પોતાનાં જ તાજાં જન્મેલાં બાળકોનું ભક્ષણ કરી જાય છે, કેમ કે એ ઘણા દિવસોથી ભૂખી હોય છે અને બચ્ચાંને છોડીને જઈ શકતી નથી એથી એ અમુકને ખાઈ જઈને બાકીનાં બચ્ચાંને બચાવી લે લે છે. જો કે આ પૃથ્વી પરનો સૌથી બુદ્ધિશાળી જીવ એવો મનુષ્ય જ્યારે માતા-પિતા તરીકે પોતાના જ બાળક માટે જોખમી બની જાય ત્યારે આપણે એ વિશે ચર્ચા કરવી જરૂરી બની જાય છે.

હમણાંની આ બે ઘટના યાદ કરીએ... મ માતા-પિતાએ પોતાના ફક્ત ત્રણ મહિનાના બાળકને ન્યુમોનિયા થઈ ગયા પછી ઈલાજ માટે એના શરીર પર ૫૧ વખત ડામ દીધા. કહેવાની જરૂર નથી કે પછી એ બાળક મૃત્યુ પામ્યું. બીજા કિસ્સામાં કૅન્સરથી પીડાતા સાત વર્ષના દીકરાને એનાં માતા-પિતાએ ગંગા નદીના ઠંડા પાણીમાં પાંચેક મિનિટ ડુબાડી રાખ્યો. કારણ? એ જઃ દીકરો કૅન્સરની બીમારીમાંથી સાજો થઈ જશે એવી અંધશ્રદ્ધા!