દેવના દીધેલ છીએ, દેવને અર્પણ કરો ભાવથી...

ઘરમંદિરમાં ભગવાનની આરાધના માટેનાં ફૂલની જરૂરત હોમ ગાર્ડનમાંથી જ પૂરી થઈ જાય તો એના જેવું રૂડું શું?

- પૂર્વી શાહ

પ્રભુઅર્પણ કરાતાં ફૂલ-પાંદડાં ઉચ્ચ પોતાની સુગંધથી કૉસ્મિક એનર્જી સાથે બહુ જલદી કનેક્ટ કરી શકે છે.

માર્કેટમાં મળતાં વ્યવસાયી ઢબે ઉગાડાયેલાં ફૂલોમાં જંતુનાશક અને રાસાયણિક ખાતરનો અતિરેક હોય છે. એના બદલે જો આપણે ઘરે ભક્તિભાવથી, સાત્ત્વિક રીતે ફૂલછોડ ઉગાડીએ તો એનાં ફૂલો શબરીનાં બોર જેવું જ કામ કરશે.

ગુલાબને ફૂલોનો રાજા કહ્યો છે, કેમ કે એ બધા જ દેવને પસંદ છે. બુકેમાં સજાવાતા વિલાયતી ગુલાબ મોટી સાઈઝના, પણ સુગંધરહિત હોય છે. એમાં રંગોના વિકલ્પ છે, પણ ઔષધીય ગુણો નથી. બીજી તરફ, અનેક રંગમાં પ્રાપ્ય દેશી ગુલાબનો મઘમઘાટ મનને તરબતર કરે છે. એના છોડ પર ભમરા, પતંગિયાં અનેક આવે ગુલાબની પ્રકૃતિ શીતળ હોવાથી એ ઠંડીમાં પુષ્કળ થાય છે. હા, પણ એને તડકો ખૂબ જોઈએ. ઉત્તર ભારતમાં મળતી ગુલાબની વેલમાં ગુચ્છા ભરીને ફૂલ ઊતરે છે. આંગણામાં પૂરતી જગ્યા અને તડકો હોય ત્યાં આ વેલ રોપવી જોઈએ.