ગુજ્જુ ઈન્ફ્લુઅનાની જિંદગાનીમાં ડોકિયું

સોશિયલ મિડિયાનું ઘેલું આજે આબાલવૃદ્ધ સૌને લાગ્યું છે. ‘મને જુઓ, મારી ટેલેન્ટ અને પર્સનાલિટી જુઓ’ એવી જાહેરાત જગત સામે કરવી સૌને ગમે છે. જે લોકો સચોટ રીતે આમ કરી શકે છે એ સોશિયલ મિડિયાની દુનિયામાં ઈન્ફ્લુઅન્સર તરીકે પંકાય છે. સુરતનાં આવાં જ એક ઈન્ફ્લુઅન્સરની લાઈક-કમેન્ટ-શૅરની સૃષ્ટિ જોવા-જાણવા જેવી છે.

- મોના શેઠ

ઈન્ટરનેટ પર જે ચાહે તે કહેવાની-બતાવવાની સગવડ આપતો અને સોશિયલ મિડિયા તરીકે ઓળખાતો મંચ આજે એ તબક્કામાં પ્રવેશી ગયો છે કે તમારે એની પર રહેવું-ન રહેવું એ હવે સવાલ રહ્યો જ નથી. સવાલ ફક્ત એ છે કે તમે કેટલી સારી રીતે એનો ઉપયોગ કરી શકો છો, એના માધ્યમથી કેવી રીતે બીજા પર પ્રભાવ પાડી શકો છો અને કેવી રીતે લોકપ્રિય બની શકો છો.

અલબત્ત, જે લોકો સોશિયલ મિડિયા પર છે એ બધા ઈન્ફ્લુઅન્સર બની શકતા નથી. પ્રભાવક એ જ બની શક્યા, જે જરા હટકે છે, જેમનો પ્રભાવ લોકો પર સકારાત્મક પડે છે, જેમણે મૂકેલા સંદેશા, તસવીરોથી લોકોને પ્રેરણા મળે છે. ચાહકો તરફથી એમને માન-સમ્માન-પ્રેમ મળે છે.

સુરત શહેરનાં ગૃહિણી રૂપલ મિતુલ શાહ આવાં જ એક સફળ ઈન્ફ્લુઅન્સર છે. કોઈ પણ પૂર્વયોજના વગર ઈન્ફ્લુઅન્સર બનવાની એમની યાત્રા રસપ્રદ તો છે જ, પણ ઘણાને ઘણું બધું શીખવી જાય છે. એમનું કહેવું છે કે ‘કામ એ કરવું, જેમાં મજા પડે. મગજ પર જેનો ભાર લાગે એ કામ મજા નહીં, સજા લાગે છે.’

ઈન્સ્ટાગ્રામ જેવા પ્લૅટફૉર્મ પર આશરે અઢી લાખ ફોલોઅર્સ ધરાવતાં રૂપલ શાહની એક-એક પોસ્ટને સેંકડોહજારોની સંખ્યામાં લાઈક્સ-કમેન્ટ્સ મળે છે. આ પોસ્ટમાં ક્યારેક એમની સ્ટાઈલની વાત હોય તો ક્યારેક મશ્કરા વિડિયોઝ પણ હોય. ક્યારેક એમની રોજિંદી, વ્યસ્ત જિંદગીને હળવાશથી રજૂ કરી હોય તો ક્યારેક ફૅશન, જ્વેલરીની વાત હોય.

માત્ર બે-અઢી વર્ષમાં ગૃહિણીમાંથી ઈન્ફ્લુઅન્સર બનવાનો રૂપલનો પ્રવાસ રસપ્રદ છે. ભાવનગરમાં જન્મેલાં-ઊછરેલાં રૂપલ શાહ પરિવારનાં સૌથી નાનાં દીકરી. સુરતમાં અંગ્રેજી માધ્યમની સ્કૂલમાં ભણતર દરમિયાન ઈતર પ્રવૃત્તિમાં ઘણી રુચિ. સ્પોર્ટ્સ, ગરબા, વગેરેમાં ભાગ લેવાની સાથે ભણવામાં પણ અવ્વલ.