રાજકારણમાં પીળું એટલે સોનું નહીં જ...

રાજકીય જીવનમાં અત્યંત સાદગીપ્રિય ગણાતાં મમતા બેનરજીનાં સાથી નેતા મહુઆ મોઈત્રા એમની ઉડાઉ જીવનશૈલીને કારણે ચર્ચાને ચાકડે ચડ્યાં છે અને એટલી હદ સુધી વગોવાઈ ગયાં છે કે અત્યારે એમનો પક્ષ પણ એમની પડખે ઊભો રહેવા તૈયાર નથી. સવાલ બે કરોડનો... તૃણમૂલ કોંગ્રેસનાં સાંસદ મહુઆ મોઈત્રાઃ સરકારને સવાલ પૂછી શકવાના અધિકારનો આવો દુરુપયો?

- હીરેન મહેતા

રાજસ્થાન અને મધ્ય પ્રદેશ સહિતનાં રાજ્યોમાં વિધાનસભા ચૂંટણીનું વાતાવરણ હજી જામ્યું નથી, પણ છએક મહિના પછી આવનારી લોકસભા ચૂંટણી માટેની હવા જામવા લાગી છે. કંઈક ને કંઈક એવી ઘટના બને રાખે છે જે લોકસભા ચૂંટણી માટેના માહોલ પર અસર પાડે એવી પાક્કી શક્યતા છે.

પશ્ચિમ બંગાળનાં અતિ વાચાળ સંસદસભ્ય મહુઆ મોઈત્રા એક વિચિત્ર કેસમાં ફસાયાં છે.હાલત એવી થઈ છે કે તૃણમૂલ કોંગ્રેસનાં સંસદસભ્ય મહુઆ મોઇત્રા પક્ષનાં પ્રમુખ અને બંગાળનાં મુખ્ય મંત્રી મમતા બેનરજી નાં અતિ વિશ્વાસુ હોવા છતાં તૃણમૂલ કોંગ્રેસે મહુઆના પ્રકરણથી હાથ ધોઈ નાખ્યા છે અને પક્ષનો કોઈ નેતા દેખાડવા ખાતર પણ એમના બચાવમાં આવ્યો નથી.

આપણા રાજકારણીઓની છાપ બહુ ઊજળી રહી નથી. ભારતીય ફોજદારી સંહિતામાં નોંધાયેલા બહુ ઓછા ગુના એવા હશે જે આપણા કોઈ ને કોઈ રાજકીય આગેવાનોના નામે ન ચડ્યા હોય. રાજકારણીઓને તો એવા અપરાધ કરવા મળે છે જે કાયદાના પુસ્તકમાં પણ ન હોય. કૅશ ફૉર ક્વેરી એવો જ એક ગુનો છે. કોઈ ને કોઈ હિત ધરાવતા લોકો એમના હરીફોને ભીડવવા સંસદસભ્યો કે વિધાનસભ્યોને લોકસભા કે ધારાસભા જેવાં વૈધાનિક ગૃહોમાં સવાલ પૂછવાના પૈસા ચૂકવે છે. રાજકારણીઓ લાગતા-વળગતા લોકો પાસેથી તગડી રકમ લઈને સંસદમાં કોઈ પ્રશ્ન ઉઠાવે અને એ મુદ્દે વિવાદ ઊભો કરે. ક્યારેક તો આવા મુદ્દાને સંસદ કે વિધાનસભાની કાર્યવાહી સાથે કોઈ લેવાદેવા ન હોય તો પણ જાણીજોઈ ને આવા સવાલ પૂછવામાં આવે. રાજકારણીઓને પૈસા મળી જાય અને એ પૈસા ચૂકવવાવાળાને પોતાના હરીફ સાથે હિસાબ બરોબર કરવાનો મોકો મળી જાય.