રોજનાં સરેરાશ એક લાખ નવાં ડિમેટ એકાઉન્ટ્સ રિટેલ રોકાણકારોનો વધી રહેલો પાવર છે બજાર માટે બૂસ્ટર

શૅરબજારમાં વધ-ઘટ થયા કરવી સહજ છે. જો કે અત્યારે તો ચર્ચા છે માર્કેટમાં ઉમેરાઈ રહેલા ઈન્વેસ્ટર્સની. અલબત્ત, આ રોકાણકારો સમજી-વિચારીને આગળ વધે એમાં જ સાર છે.

- જયેશ ચિતલિયા

શું તમે જાણો છો કે દેશમાં ડિમેટ એકાઉન્ટ્સની કુલ સંખ્યા તેર કરોડને આંબવા આવી છે? હા, ઓગસ્ટ મહિનાના અંતે આ આંક ૧૨.૬૬ કરોડ સુધી પહોંચી ગયો હતો. ઓગસ્ટમાં નવાં ૩૧ લાખ એકાઉન્ટ્સ ખૂલ્યાં. જુલાઈમાં આ આંક હતો ૨૯.૭ લાખ તો આગલા વરસના સમાન સમયગાળામાં હતો ૨૧ લાખ.

આ આંકડા જે સીધી અને સચોટ વાત કરે છે તે એ કે ફાઈનાન્સિયલ માર્કેટમાં રોકાણકારોની સંખ્યા કૂદકે ને ભૂસકે વધી રહી છે. મ્યુચ્યુઅલ ફંડની વિવિધ યોજના મારફત તેમ જ શૅરબજારમાં સીધા રોકાણ મારફત રિટેલ અર્થાત્ નાના રોકાણકારોનો દબદબો વધી રહ્યો છે. ફાઈનાન્સિયલ સાધનો તરફ એમનો વધતો રસ અને રોકાણપ્રવાહ એમના માટે તેમ જ અર્થતંત્ર માટે પણ સારી બાબત છે. અલબત્ત, એમનું આ રોકાણ અભ્યાસ આધારિત હોય એ જરૂરી છે. જો આ ઈન્વેસ્ટર્સ આડેધડ-ઝટપટ રોકાણની જાળમાં પડ્યા હશે તો એ એમની અને બજાર માટે પણ એની નકારાત્મક અસર હશે.

નાના રોકાણકારોની સંખ્યા કેમ વધી?