દાગ અચ્છે હૈ..? ના, વાસણ તો ચોખ્ખાંચણક જ જોઈએ!

થાળી-વાટકા હોય કે તપેલી, કૂકર હોય યા ચાકુ-છરી, ડાઘ કે કાટ એના પર ન જ શોભે. તો ઉપાય શું?

- વિશ્વા મોડાસિયા

વર્ષો પહેલાં લગભગ દરેક ઘરમાં તાંબા અને કાંસાનાં વાસણ રહેતાં. સમય જતાં એનું સ્થાન સ્ટેનલેસ સ્ટીલનાં વાસણે લીધું. હવે કાચનાં ડિશ-બાઉલ, વગેરેનું ચલણ પણ છે. જો કે રસોઈ માટે સ્ટીલનાં વાસણની જગ્યા કોઈ લઈ શક્યું નથી. સ્ટેનલેસ સ્ટીલ ખોરાકને ઝેરી તત્ત્વોથી બચાવે છે અને એમાં બનાવેલી રસોઈમાં તમામ વિટામિન્સ અને મિનરલ્સ પણ જળવાઈ રહે છે. હા, એટલું ખરું કે આ વાસણ સમય જતાં ચમક ગુમાવી દે છે અને ક્યારેક એની પર ડાઘા પણ પડી જાય છે.

– તો ચાલો, આજે એવી થોડી ટિપ્સ, જે રસોડામાં વપરાતી જુદી જુદી વસ્તુ અને વાસણને લાંબો સમય ચકચકિત રાખવામાં મદદ કરી શકે.

ઘરમાં વપરાતાં કૂકર અને શાક બનાવવાનાં વાસણમાં ડાઘ રહી ગયા હોય તો એને દૂર કરવા માટે ઘરમાં રહેલા બેકિંગ સોડાનો ઉપયોગ કરી શકાય. પાણી થોડું ગરમ કરી બે ચમચી જેટલો ખાવાનો સોડા એટલે કે બેકિંગ સોડા ભેળવી બે-ત્રણ કલાક સુધી રાખી મૂકવું. એ પાણીમાં વાસણ ડૂબે એ રીતે રાખવાં અને પછી બરાબર સાફ કરી લેવાં.