અનેરી ઋતુ દે એક તાળી આઝાદીની..

શરીર પુરુષનું, અંદર વસે એક સ્ત્રી. પરિવાર તરફથી અસ્વીકાર અને તન-મનમાં જામેલી ગડમથલની સ્થિતિમાં પોતાની ઓળખ ઠેરવવા બસ, એક દિવસ એણે ફેંસલો લઈ લીધો અને.. હવે એનું સપનું છે આઈએએસ કૅડરના ઉચ્ચ અધિકારી બની દેશસેવા કરવાની.

- હેતલ રાવ

મને સમજાતું નહોતું કે કેમ મારી સાથે આવું થઈ રહ્યું છે. પપ્પા, મમ્મી, દીદી, બધાં મારા પર ગુસ્સો કરતાં હતાં, પણ મારી પર જે વીતી રહ્યું હતું એનો કોઈને અંદાજ નહોતો. હું એમને એટલું જ પૂછતી કે હું જે છું એમાં મારો શું વાંક છે?

આ શબ્દો છે અમદાવાદના મણિનગર વિસ્તારમાં રહેતા ઋત્વિક શાહના.

અલબત્ત, હવે એની ઓળખ બદલાઈ ગઈ છે અને એ ઋતુ દે નામથી ઓળખાય છે. આ વાત છે એક કિન્નરની, જે પારાવાર વેદના સહન કરી આઈએએસ કૅડરના વરિષ્ઠ સરકારી અધિકારી બનવા માટેની વિશેષ પરીક્ષાની તૈયારી કરી રહી છે.

આપણા સમાજે હજી કિન્નરોને અપનાવ્યા નથી. સ્ત્રૈણ લક્ષણ ધરાવતા પુરુષો આજેય મજાકનું પાત્ર બને છે. આ વાસ્તવિકતા વચ્ચે કોઈ કિન્નર પોતાની જાતને પુરવાર કરવા મથે અને સાથોસાથ રાષ્ટ્રીય સ્તરે લેવાતી કેન્દ્રીય જાહેર સેવા આયોગ (યુપીએસસી)ની પરીક્ષા આપવાનું વિચારે એ જ બહુ મોટી વાત છે, પણ હા, ઋતુએ એ સપનું જોયું છે અને અત્યારે એની તૈયારીમાં લાગી ગઈ છે. એનું લક્ષ્ય છેઃ આવતા વર્ષે (૨૦૨૪માં) લેવાનારી આઈએએસની પરીક્ષા!

અલબત્ત, એ પહેલાં તો એણે ઋત્વિકમાંથી ઋતુ બનવાની સફર કાપવી પડી અને આ સફર પણ એના માટે અતિ કપરી કસોટીથી ભરેલી હતી.

અમદાવાદમાં રહેતાં ગીતાબહેન અને રમેશચંદ્ર શાહને ત્યાં બે દીકરી અને એક માનસિક વિકલાંગ પુત્ર પછી ૨૦૦૧માં ઋત્વિકનો જન્મ થયો ત્યારે સમગ્ર પરિવારમાં ખુશીની લહેર ફેલાઈ ગયેલી. માતા-પિતાને લાગ્યું કે હાશ, ભગવાને અમારું સાંભળ્યું, અમને અમારો વંશજ આપ્યો. ઋત્વિકના જન્મ પછી રમેશચંદ્ર અને ગીતાબહેનનું જીવન બદલાઈ ગયું. જાણે બધું સારું જ થતું હતું.