પાપાની પરી, દીકરો લાડડવાયો ને સ્માર્ટફોન..

મૉડર્ન જમાનાની મૉડર્ન સમસ્યાઃ કોઈની પ્રાઈવેટ મોમેન્ટ્સને, ખાસ તો જાહેરમાં વહાલ દર્શાવતાં યુગલની હરક્તને મોબાઈલમાં ઝડપી એને પબ્લિક કરી દેતા પંચાતિયાની જમાત વકરી રહી છે.

- કેતન મિસ્ત્રી

આજથી પચાસેક વર્ષ પહેલાં સ્વર્ગસ્થબાસુ ચેટરજીએ એક ક્યૂટ ફિલ્મ બનાવેલી પિયા કા ઘર. મરાઠી ફિલ્મ મુંબઈચા જાવઈ (મુંબઈનો જમાઈ) પરથી બનેલી આ રાહી હું એક નવો ફિલ્મમાં નવાં નવાં પરણેલાં માલતી અને રામ (જયા ભાદુરી-અનિલ ધવન) સંયુક્ત કુટુંબમાં એકાંત માટે તલસે છે, રીતસરનાં સ્ટ્રગલ કરે છે. મુંબઈના પાંચ મજલી માળાના એક રૂમ-રસોડામાં રામ એનાં માતા-પિતા, મોટાં ભાઈ-ભાભી સાથે રહે છે. ઉત્તર ભારતના કોઈ ગામના વિશાળ, મોકળાશવાળા ઘરેથી અલબેલી નગરી મુંબઈ વિશે જાતજાતની કલ્પનાનું ભાથું બાંધીને સાસરે આવેલી માલતી મુંબઈની ચાલ જોઈને દિગ્મૂઢ બની જાય છે. પાર્ટિશન કરીને બનાવેલા કામચલાઉ બેડરૂમમાંથી રાતે જરાસરખો અવાજ થાય તો પાર્ટિશનની પેલી બાજુથી બધા ખીખીખીં કરીને હસવા માંડે. એકાંતનો મેળ ન પડતાં રામ એક દિવસ માલતીને મુંબઈદર્શન કરાવવા લઈ જાય છે. હરીફરીને પછી હોટેલ રૂમમાં ચેક-ઈન કરે છે..

પછી શું થાય છે એની કથા લંબાવવાનો ઈરાદો નથી, કેમ કે પિયા કા ઘર આપણો વિષય નથી. વિષય છેઃ મુંબઈ-દિલ્હી જેવાં દેશનાં મહાનગરોમાં પરણેલાં તથા પ્રેમી યુગલોની એકાંતની સમસ્યા. અલબત્ત, આ સમસ્યા આજની નવી છે એવું નથી, પણ છેલ્લા થોડા સમયથી આ સમસ્યાને મૉડર્ન ટચ મળ્યો છે. કહો કે મોબાઈલ ફોનને કારણે સમસ્યા વકરી ગઈ છે. કોઈને કદાચ નવાઈ લાગે કે પ્રાઈવસી અને મોબાઈલ ફોનને શું લેવાદેવા, તો આ વાંચોઃ

એક સમય હતો જ્યારે પ્રેમી યુગલને બગીચાના ખૂણામાં બેસીને અમુક ટાઈપની હરકત કરતાં કોઈ ઓળખીતું જોઈ જતું તો એની વાતો થતી: ‘આજે મેં પેલી બીજા માળવાળી શોભનાને ભોંયતળિયાની કૉર્નરવાળી રૂમમાં રહેતા પ્રકાશ સાથે માણેકચંદ પાર્કમાં જોઈ.’ અમુક લોકો એ પંચાતિયાની વાત માનતા તો અમુક બેનિફિટ ઑફ ડાઉટ આપતા ને વાત ભુલાઈ જતી.

આજે પ્રકાશ-શોભના મોબાઈલ ફોનમાં ઝડપાઈ જાય છે, એમના વિડિયો બની જાય છે અને યુગલને કંઈ સમજાય એ પહેલાં તો ચેપી રોગની જેમ એ વિડિયો હજારોના મોબાઈલમાં ફેલાવા માંડે છે, વાઈરલ થઈ જાય છે. પેલો પંચાતિયો હવે સગર્વ કહી શકે છે: ‘મારી પાસે પ્રૂફ છે.

ગયા મહિને દિલ્હીની મેટ્રોમાં એક કપલ એકમેકના હાથ ઝાલીને ઊભું હતું ત્યારે સીટ પર બેઠેલાં બે આન્ટીએ એમને ઘઘલાવતાં કહ્યું કે જાહેર જગ્યાએ જરાં સખણાં રહેતાં હો તો? લગીરે શરમ નથી આ લોકોને.. એમની દખલઅંદાજીથી રોષે ભરાયેલાં કપલે સામા જવાબ આપ્યા એનો વિડિયો વાઈરલ થયો.